افغانستان کې د ملګرو ملتونو د ماشومانو د ملاتړ صندوق (یونیسف) په یوه راپور کې خبرداری ورکړی وايي، افغانستان کې له ۸.۸ میلیونه زیات ماشومان له کابو درې ډوله اقلیمي خطر سره مخ دي.
رخشانه: د یونیسف په راپور کې چې نن (سه شنبې د غبرګولي ۲۶ مه) خپور شوی راغلي، افغانستان د ماشومانو د زیانمنېدو له نظره سویلي آسیا کې په لوړه کچه کې دی.
د راپور له مخې، «په ۲۰۲۶ کې د ماشومانو اقلیمي خطرونه» له ۸.۸ میلیونه زیات افغان ماشومان، د سېلابونو، وچکالۍ، سختې ګرمۍ، تېزو طوفانونو او دوړو سره مخ دي.
یونیسف په خپل راپور کې وايي، افغانستان کې کابو ۲۱ میلیونه ماشومان ژوند کوي او له ۸.۸ میلیونه څخه زیات یې، چې ۴۱ سلنه ماشومان کېږي، د دې خطرونو سره مخ دي.
د دې راپور پر بنسټ، له ۷۵ سلنې زیات ماشومان، افغانستان کې د وچکالۍ، له ۵۰ سلنې زیات د اوږدو ګرمیو ځپو له خطر او له ۱.۷ میلیونه زیات ماشومان، د سیندونو د سېلابونو له خطر سره مخ دي.
د ملګرو ملتونو د ماشومانو د ملاتړ صندوق وايي، دا خطرونه د ماشومانو لپاره هغه خدمات چې د دوی پایښت، زده کړې او روغتیا ورسره تړلې ده، ګډوډوي.
افغانستان کې د یونیسف استازی ډاکتر تاج الدین اویوالي ویلي دي «افغان ماشومان همدا اوس د اقلیمي بحرانونو په لومړۍ کرښه کې ژوند کوي، هغه څه چې دا وضعیت لا خطرناکه کوي، د ماشومانو د زیانمېدو سره د اقلیمي خطرونو هممهالتوب دی.»
هغه زیاته کړې، د روغتیا، تغدیې، اوبو، حفظ الصحی، زده کړو، د ماشومانو د ساتنې او ټولنیز خوندیتوب په برخو کې د اقلیم مقاومت لرونکو خدماتو پیاوړتیا، د نن ورځې ماشومانو د ساتنې او د دوی د راتلونکې د خوندیتوب لپاره خواره مهمه ده.
د ملګرو ملتونو د ماشومانو د ملاتړ صندوق په خپل راپور کې زیاته کړې، افغان ماشومان همدا اوس د سختې خوارځواکۍ له لوړې کچې سره مخ دی.
د دې بنسټ په وینا، وچکالۍ، سېلابونه او سختو ګرمیو، د خوړو نظامونه کمزوري کړي او پاکو اوبو ته لاسرسی کموي. هغه عوامیل چې د یونیسف په وینا، په سخته خوارځواکۍ تمامېږي.
یونیسف ټینګار کړی، چې نېږدې نیمايي افغان ماشومان د خوړو په سخت فقر کې ژوند کوي او د واکسیناسیون، روغتیايي خدماتو، نظافت او حفظ الصحې په برخو کې کمښت د زیانمنونکو ماشومانو لپاره خطرونه زیاتوي.
دې بنسټ ویلي «د اقلیمي بحران په وړاندې د ماشومانو خوندي کول په هغو خدماتو کې دوامداره پانګونې ته اړتیا لري، چې د دوی روغتیا، تغذیه، امنیت، ساتنه او زده کړې تضمینوي.»
یونیسف د ماشومانو د خوندیتوب خدماتو لپاره د بېړني بودجې غوښتنه کړې، د هغو خدماتو چې وکولی شي د اقلیمي شاکونو د مخه، په جریان او وروسته د ماشومانو ساتنه وکړي.
