د هرات حوزوي روغتون کې یوې باوري سرچینې رخشانې رسنۍ ته تایید کړې، چې د جبرئیل ښارګوټي د یوې اوونۍ وړاندې لاریونونو کې، ټپي شوی ۱۷ کلن ځوان مرتضی کریمي ژوند له لاسه ورکړ.
رخشانه: د سرچینې په وینا، دا ځوان هلک د دوشنبې شپه (د غبرګولي ۲۵ مه) د هرات په حوزوي روغتون کې له یوې اوونۍ بسترېدو وروسته، د ژورو ټپونو له امله ساه ورکړې ده.
سرچینه وايي، دا ځوان هلک په دواړو زنګونونو کې په مرمیو لګېدلی او سخت ټپي شوی وو.
سرچینې زیاته کړې، هغه د سه شنبې (غبرګولي له ۱۹ مې) د حوزوي روغتون ځانګړې څانګه کې بستر وو او تېره شپه یې ژوند له لاسه ورکړی دی.
دا سرچینه زیاتوي، د مرتضی ګردې د سخت خونرېږۍ او د وینې شریان د پرېکېدو له امله، له کاره لوېدلي وو او یوه ورځ تر منځ دیالېز کېده.
د سرچینې د معلوماتو له مخې، دا ځوان هلک دوه درې ورځې د درملو په موټ ژوندی وو، خو تېره شپه یې ساه ورکړه.
د هرات د جبرئیل ښارګوټي لسګونو اوسېدونکو تېره اوونۍ، د طالبانو له خوا د بې حجابۍ په تور د ښخو او نجونو د نیولو په غبرګون کې په اعتراضي غونډه لاس پورې کړی وو.
طالبانو د دې اعتراضي غونډې د ځپلو په موخه، په لاریونیانو مخامخ ډزې وکړې، چې په ترڅ کې یې دوه تنه و وژل شول او څو تنه نور ټپیان شوي دي.
په یوه ویډیو کې، چې د طالبانو له خوا د معترضینو ځپل ښيي او په خواله رسنیو خپره شوې، لیدل کېږي، یو ځوان چې آبي جامې یې په تن دي، په ټپي زنګونونو، د سیمې د اوسېدونکو له خوا په «رېکشه» کې لېږدول کېږي.
د هرات جبرئیل کې ځايي سرچینې وايي، طالب ځواکونو د دې اعتراضي غوندې له جوړېدو یوه اوونۍ وروسته هم، په دې لاریون کې د ګدونکوونکو د پېژندنې او نیولو په هڅه کې دي.
د طالبانو له لوري د هرات د جبرئیل اوسېدونکو د اعتراضي غونډې ځپلو د بشري حقونو او د بشري او ښځو د حقونو فعالانو پراخ غبرګونونه راپارولي دي.
