د طالبانو له خوا په دولتي ادارو کې د ځیرک تلېفونونو نه کارولو بندیز په ترڅ کې، د افغان خبریالانو مرکز ویلي، د طالبانو دا اقدام اطلاعاتو ته د خبریالانو لاسرسی لا محدودوي.
رخشانه: دې مرکز نن (چهارشنبې د غبرګولي ۲۷ مه) په یوه اعلامیه کې د طالبانو په دولتي ادارو کې په ځیرک تلېفون بندیز د بیان آزادۍ د کنټرول سیاست سختولو دوام بللی او هغه یې غندلی دی.
د افغان خبریالانو مرکز په اعلامیه کې راغلي، طالبانو له دې وړاندې هم د محدودیتونو په لګولو په ځانګړې توګه د ساه کښو انځور نه خپرولو سره، معلوماتو ته د خبریالانو لاسرسی محدود کړی وو، خو په دولتي ادارو کې د ځیرک تلېفون نه کارولو بندیز به اطلاعاتو ته د خبریالانو لاسرسی نور هم محدود کړي.
یاد مرکز زیاته کړې، د طالبانو مشر هبت الله اخوندزاده، د تېرې اوونۍ یکشنبې ورځ (د غبرګولي ۱۷ مه) د دې ډلې له یو شمېر والیانو سره په کندهار کې د لیدنې پر مهال د ځیرک تلېفونونو نه کارولو امر صادر کړی دی.
دا مرکز وايي، تر اوسه پورې په پکتیا، پکتیکا، خوست، لوګر، بلخ، کندوز، بغلان، بادغیس، بدخشان، هرات، هلمند او غزني ولایتونو کې دولتي کارکوونکو ته د ځیرک تلېفون نه کارولو ویل شوي او د دې پروسې جریان د یو شمېر نورو ولایتونو په دولتي ادارو کې هم پیل شوی دی.
د افغان خبریالانو مرکز ویلي، په دولتي ادارو کې د کارکوونکو له خوا د ځیرک تلېفون نه کارلو «اطلاع رسونه کنټرول او څاڅکی څاځکی» شوې ده.
دې مرکز په هېواد کې اطلاعاتو ته په لاسرسي د دغه محدودیتونو د منفي پایلو په اړه خبرداری ورکړی وايي، دا «اقدام د بیان آزادۍ د ځپلو یوه نوې پاڼه ښيي، چې خبریالان او رسنۍ لا زیات تر اغېز لاندې راولي.»
د افغان خبریالانو مرکز ټینګار کړی چې «د ټېکنالوژۍ او مصنوعي څرکتیا په دې پېر کې په ځیرک تلېفون بندیز د وروسته پاتې کېدو لوړه کچه ده.»
دې مرکز له طالبانو غوښتي، چې په دولتي ادارو کې پر اداري کارکوونکو د ځیرک تلېفون نه کارولو قانون لغوه کړي او د خلکو حقونو، بنسټيزو آزادیو او اطلاعاتو ته د لاسرسي حق ته چې د خلکو یوه جدي اړتیا ده درناوی وکړي.
