یو شمېر افغان ښځو او نجونو د «ښځو د آزادۍ شبکه» جوړه کړې، چې موخه یې د ښځو د حقونو لپاره ملاتړ، د زده کړو فرصتونه پراخول او د ښځو پیاوړتیا ده.
رخشانه: د ښځو د آزادۍ شبکې (FWN) د اعلامیې له مخې، چې نن (شنبې د غبرګولي ۳۰ مه) رسنیو ته لېږل شوې، دا شبکه د بشري حقونو د ارزښتونو پر اساس، یو خپلواک او غیرانتفاعي بنسټ بلل شوی، چې د کابل دشت برچي سیمه کې جوړه شوې ده.
د دې اعلامیې پر بنسټ، د دې شبکې موخې، د نجونو لپاره د شخصي او آنلاین ښوونیزو ټولګیو پیلول، د ښځو لپاره د حرفوي زده کړو چمتو کول، د روغتیا زده کړې پروګرامونو پلي کول، د ښځو او کورنۍ روغتیا په اړه پوهاوی لوړول او همدارنګه د ښځو او نجونو د کیسو مستند کول دي، تر څو د دوی وضعیت نړیوالې ټولنې ته منعکس کړي.
د ښځو د آزادۍ شبکې ټینګار کړي، چې د بشري حقونو، برابرۍ، عدالت او انساني کرامت په چوکاټ کې به د افغان ښځو او نجونو لپاره فعالیت کوي او ژمن دي، چې د ښځو غږ به تر نړیوالو بنسټونو پورې رسوي.
د اعلامیې په یوه برخه کې راغلي: «د ښځو د ګډون شبکه، د ښځو لپاره د عدالت غوښتنې، پیاوړتیا او ملاتړ لپاره جوړه شوې. موږ باور لرو، چې بدلون له ټولیز پیوستون او مقاومت څخه پیلېږي.»
د ښځو د آزادۍ شبکې له نړیوالې ټولنې، رسنیو، د بشري حقونو بنسټونو او ملګرو ملتونو غوښتي، چې د افغان ښځو د وضعیت په اړه چوپتیا غوره نه کړي او د ښځو د بنسټیزو حقونو او خپلواکیو د ملاتړ لپاره اساسي ګامونه تر لاس لاندې ونیسي.
د دې شبکې غړو دغه راز هرات کې د ښځو او نجونو د نیولو تازه څپې ته، چې درېیمې اوونۍ ته د ننه شوې په اشارې، له روان وضعیت څخه ژوره اندېښنه څرګنده کړې ویلي یې دي: «افغان ښځې د نړیوالې ټولنې ملاتړ، پیوستون او پاملرنې ته اړتیا لري.»
دا په داسې حال کې ده، چې طالبانو د غبرګولي له ۱۵ مې، هرات کې د «بې حجابۍ» په تور د ښځو او نجونو د نیولو لړۍ پیل کړې، هغه ګام، چې هرات او کابل کې یې د ښځو او نجونو پراخې اندېښنې راپارولې دي.
