د ایټالیا پلازمېنه روم ښار کې لسګونو افغانو وګړو، د بشري حقونو فعالانو او ایټالویانو، د یوې اعتراضي غونډې پر مهال، له افغان ښځو سره په پیوستون کې، له طالبانو سره د اړیکو عادي کول وغندل.
رخشانه: معترضینو پرون (یکشنبې د غبرګولي ۳۰ مه) د طالبانو تر واکمنۍ لاندې، د ښځو او نجونو د حقونو د سرغړونو د دوام په اړه خبرداری ورکړ.
د دې اعتراضي غونډې ګډونوالو په یوه بیانیه کې له اورپايي هېوادونو وغوښتل، چې د دې وضعیت د عادي کېدو مخه ونیسي او دا په نړیوالو اړیکو کې په یوه منل شوي واقعیت بدل کړي.
همدارنګه ګډونوالو د دولتونو له لوري طالبانو ته د هر ډول مشروعیت ورکولو او له هغوی سره د اړیکو عادي کولو باندې اندېښنه وښوده او ټینګار یې وکړ: «د ښځو د حقونو نه په پام کې نیول، د بشري حقونو له بنسټیزه اصولو څخه سترګې پټول دي.»
دې لاریونیانو له دولتونو، نړیوالو بنسټونو او د بشري حقونو له مدافع سازمانونو وغوښتل، چې د افغان ښځو د حقونو او خپلواکیو د دفاع لپاره ګټور او عملي ګامونه پورته کړي.
په دې غونډه کې ګډنوالو په تورو ټوټو د خپلو خولو په تړلو، د لاسونو په اشارو د مرستې او د شعارونو په ورکولو سره یې د افغانستان وضعیت ته د نړیوالې ټولنې د پاملرنې غوښتنه وکړه.
د دې پروګرام په یوه برخه کې، په افغانستان کې د طالبانو د پنځه کلنې واکمنۍ پر مهال د ښځو د زده کړو او کار موضوع د وضعیت په اړه اعتراضي نندارې وړاندې شوې.
د نړۍ په بېلا بېلو هېوادونو کې د افغان وګړو دا لاریونونه په داسې حال کې تر سره کېږي، چې ټاکل شوې اروپايي ټولنه بروکسل کې له طالب استازو سره یوه غونډه وکړي.
افغان وګړو تر اوسه پورې د آلمان، هسپانیا او استهکم په بېلا بېلو ښارونو او نړۍ په نورو هېوادونو کې اعتراضي غونډې تر سره کړې دي.
د ملګرو ملتونو ځانګړي راپور ورکوونکي ریچارد بنټ، له طالبانو سره لیدنه، د افغانستان خلکو په ځانګړې توګه ښځو ته سپکاوی بللی دی.
