د افغانستان د بشري حقونو لپاره د ملګرو ملتونو ځانګړی راپور ورکوونکی ریچارد بنټ وايي، اروپا ته د طالبانو بلل او بروکسل کې د دې ډلې له چارواکو سره لیدنه، د افغانستان خلکو په ځانګړې توګه ښځو ته سپکاوی دی.
رخشانه: ښاغلي بنټ نن (دوشنبې د چنګاښ اوله) په خپله اېکس پاڼه، د کډوالو د ستنولو په اړه د اروپايي ټولنې د نویو مقرراتو په اړه، د دې سازمان د بشري حقونو عالي کمېشنر فولکر تورک له دریځ نه په ملاتړ لیکلي، چې د دې قانون پلي کېدل باید د بشري حقونو او د کډوالوالی له نړیوالو قوانیونو سره سمون ولري.
ښاغلي بنټ ټینګار کړی، چې افغان وګړي نباید په ناامنه شرایطو کې ونه ستنول شي.
همدارنګه هغه ویلي، بروکسل کې له طالب استازو سره لیدل، ښايي د افغانستان خلکو په ځانګړې توګه ښځو ته سپکاوی وي.
د ملګرو ملتونو د بشري حقونو عالی کمېشنر فولکر تورک تېره ورځ په یوه بیانیه کې، د کډوالو د ستنولو په اړه د اروپايي ټولنې پر نوي قانون اندېښنه وښوده ویې ویل، د اروپايي ټولنې غړې هېودونه نه شي کولی، د بشري حقونو په اړه خپلې ژمنې درېیمګړو هېوادونو ته پرېږدي.
هغه خبرداری ورکړ، چې د زیانمنونکو کسانو، په ځانګړې توګه د ماشومانو نیول او درېیم هېواد ته لېږدول، د بشري حقونو سرغړونې لا زیاتوي.
په بیانیه کې راغلي دي: «هېڅوک باید داسې ځای ته ونه لېږدول شي، چېرې چې دوی د بشري حقونو د جدي سرغړونو یا نورو نه جبرانېدونکو زیانونو سره مخ وي.»
ښاغلي تورک له اروپايي ټولنې او د هغو له غړو هېوادونو غوښتي، تر څو دا ډاډ تر لاسه کړي، چې د نویو مقرراتو پلي کول، د بشري حقونو له نړیوالو قوانینو، د کډوالو حقونو او په جبر د نه ستنولو له اصل سره سمون لري.
هغه زیاته کړې، چې د دې ډول سیاستونو په پلي کولو کې له بشري حقونو او انساني کرامت څخه د ساتنې مسلې ته باید په قاون او عمل دواړو کې لومړیتوب ورکړل شي.
همدارنګه فولکر تورک ټینګار وکړ، چې د کډوالو ایستلو پورې اړندونه تصمیمونه باید د فردي ارزونو پر اساس ونیول شي او د اعتراضونو او غوښتنلیکونو د پروسې تر پای ته رسېدو پورې پلې نه شي.
د ملګرو ملتونو د بشري حقونو عالي کمېشنر له اروپايي دولتونو غوښتي، چې په امنیتي مسائلو پورې د کډوالۍ له پیوند کولو ډډه وکړي او د کډوالو او پناه غوښتنې بحثونه، د واقعیتونو او انساني کرامت پر بنسټ مخ ته یوسي.
همدارنګه په دې بیانیه کې راغلي، د کډوالۍ په مسئله کې باید متوازن چلند وشي او اروپا په اقتصاد او ټولنو کې د کډوالو رول او برخې ته پاملرنه وشي.
دا په داسې حال کې ده، چې د کډوالو د بېرته ستنولو د نوي قانون پر بنسټ، چې د می میاشتې په ۲۷ مه، د اروپايي ټولنې له خوا تصویب شو، د دې ټولنې غړو هېوادونو ته اجازه ورکوي، چې په درېیمو هېوادونو کې د «ستنول شویو کډوالو پنډغالي» په نومونو مرکزونه جوړ کړي.
