ځايي سرچینې وايي، د هرات ولایت د جبرئیل هزاره مېشتې سیمې د اوسېدونکو له اعتراض وروسته، د دې سیمې پر خلکو د طالبانو فشارونه زیات شوي او یو مدني فعال هم نیول شوی او زنداني شوی دی.
رخشانه: د طالبانو د امربالمعروف محتسبینو د سه شنبې ورځ د (غبرګولي ۳۰مه) ۴:۳۰ بجې د امان الله حسیني په نوم یو مدني فعال، د هرات ښار په آمریت څلورلاري کې ونیوه او د دوه ورځو لپاره یې زنداني کړ.
د سیمې د یوې کمرې په یوه ویډیو کې چې رخشانې رسنۍ تر لاسه کړې ښيي، چې د طالبانو د امربالمعروف محتسبین لومړی له ښايي حسیني سره خبرې کوي او وروسته هغه له ځان سره بیاي.
ښاغلی حسیني وايي، محتسبین وروسته له هغې، چې متوجه کېږي دی هزاره او د جبرئیل اوسېدونکی دی، له ځان سره یې بیايي.
ښاغلي حسیني و ویل: «څو دقیقې یې له ما سره خبرې وکړې، کله چې پوه شول هزاره او د جبرئیل اوسېدونکی یم، ویل یې حرکت وکړه او ان نه یې پرښودم، چې خپل تلېفون او واسکټ راواخلم.»
د هغه په وینا، طالبانو د ده د نیولو دلیل د «ږیرې خرېیل» بلل او دی یې څلورمې حوزې ته ولېږداوه.
نوموړی زیاتوي، د څېړنې پر مهال، د څلورمې حوزې آمر له ده څخه د جبرئیل په لاریونونو کې د ګډون په اړه پوښتنې وکړې.
حسیني و ویل: «ما ورته ویل، زه د ږیرې کلولو په خاطر دلته راوستل شوی یم، خو د حوزې امر ویل، نه احتمالآ ته د لاریونیانو له ډلې یې.»
هغه دوام ورکوي: «یوازې پوه شوم، چې زه یې د خپلې شخصي عقدې په خاطر بندي کړم، ځکه څوک چې لومړی وار یې وي، امربالمعروف ته یې بیايي، ژمنه ترېنه اخلي او خوشی کوي یې.»
ښاغلی حسیني له دوه ورځې بند وروسته، د یوه سني عالم په ضمانت خوشی شوی دی. د نوموړي په وینا، له ده ژمنه واخیستل شوه، چې که بیا د ږیرې کلولو په خاطر ونیول شو، نو د طالبانو محکمې ته به وروپېژندل شي.
دا په داسې حال کې ده، چې د ځايي سرچینو په وینا، وروسته له هغې، چې د هرات اوسېدونکو د طالبانو د محتسبینو له خوا د بې حجابۍ په تور، د ښځو او نجونو د نیولو په غبرګون کې لاریون وکړ، پر نارینه وو د طالبانو فشارونه زیات شوي او طالبان یو شمېر نارینه د ښځو سره د همکارۍ په تور نیسي.
