ځايي سرچینې وايي، ناپېژاندو وسله والو کسانو د ننګرهار ولایت سرخرود ولسوالۍ کې یوه ښځینه ډاکتر په خپل کور کې وژلې ده.
رخشانه: د سرچینو په وینا، دا پېښه د یکشنبې په ورځ د (غبرګولي ۳۱ مه) د ننګرهار ولایت د بهسود ولسوالۍ اړوند د «کابل کمپ» په سیمه کې رامنځ ته شوې ده.
دوو سرچینو چې نه غوښتل نوم یې واخستل شي ویلي، دا ډاکتره ګلالۍ نومېده، د پچیراګام ولسوالۍ اوسېدونکې وه او د همدې ولسوالۍ په یوه روغتیايي مرکز کې یې دنده تر سره کوله.
د سرچینو د معلوماتو پر اساس، وسله وال کسان د شپې مهال د هغې کور ته ورغلي، تر سختې ربړونې وروسته یې ګلالۍ، خفه کړې او وروسته یې په قتل رسولې ده.
د دې ډاکترې د کورنۍ یو تن غړي چې نه غوښتل نوم یې واخیستل شي، وايي، وسله والو کسانو د ګلالۍ پلار هم وهلی ټکولی، لاس یې ورمات کړی او وروسته یې تړلی او په همغه حالت کې یې پرېښی دی.
د کورنۍ د دې غړي په وینا، ګلالۍ څو میاشتې وړاندې په یوه غږیز پیغام کې شکایت کړی وو، چې د طالبانو ځینو غړو له هغې ناسمې او غیر اخلاقي غوښتنې درلودې، خو طالبانو تر اوسه د دې ادعا په اړه هېڅ ډول رسمي ګام نه دی پورته کړی.
هغه زیاته کړې، ګلالۍ د کورنۍ یوازې ډوډۍ موندونکې وه، چې د خپلې کورنۍ لګښتونه یې برابرول.
ننګرهار کې طالب چارواکو تر اوسه په دې اړه نظر نه دی څرګند کړی.
