طالب استازو په ۲۰۲۱ کې واک ته له رسېدو وروسته، د لومړي ځل لپاره پرون سه شنبې د (چنګاښ ۲مه) بروکسل کې د اروپايي ټولنې چارواکو سره ولیدل. دغه غونډه چې موخه یې له اروپايي هېوادونو د افغان کډوالو ستنول وو، د بشري حقونو او ښځو د حقونو فعالانو له سختو غبرګونو سره مخ ده.
رخشانه: د رسنیو د راپورونو له مخې، بلجیم له دې وړاندې د طالبانو د پنځو استازو لپاره یوې ورځنۍ وېزې چې یوازې د بلجیم تر خاورې محدودې دي، صادرې کړې دي. دا لیدنه د اروپايي کمېسیون او سویډن په ګډ کوربتوب او د اروپايي ټولنې د ۱۵ غړو هېوادونو د استازو په ګډون اروپا کې جوړه شوه.
د طالبانو د بهرنیو چارو وزارت ویاند عبدالقهار بلخي په خپله فسبوک پاڼه دا یو «تاریخي» لیدنه بللې وايي، دا لومړی ځل دی، چې د افغانستان له حکومت نه یو پلاوی د اروپايي کمېسیون او د دې ټولنې د غړو هېوادونو سره په بروکسل کې خبرې اترې کوي.
اروپايي کمېسیون هم ټینګار کړی، چې دا غونډه د طالبانو په رسمیت پېژندنه نه ده، خو د بشري حقونو فعالان دا بیان کافي نه بولي.
د ښځو د حقونو فعاله شهزاد اکبر وايي، په نړیواله کچه د طالبانو د حضور ورځ تر بلې عادي کول، د نړیوالې ټولنې له لوري د افغان ښځو او نجونو له حق او انساني کرامت نه یو ډول انکار کول دي.
د هغې په وینا، د نړۍ له خوا د طالبانو د ښځو ځپوونکو سیاسیتونو ورځ تر بلې منل، افغان ښځې د ګڼ شمېء جبهوو په وړاندې درولې، له هغې جملې د همغه اروپايي دولتونو په وړاندې، چې ځان د «بشري حقونو ملاتړي» بولي.
د بشري حقونو څار ډله کې د افغانستان د برخې څېړونکې فرشته عباسي وايي، دا لیدنه د اروپايي ټولنې غړو هېوادونو لپاره یو «لوی شرم» دی.
هغې ټینګار کړیو چې له طالبانو سره هر ډول تعامل باید د بشري حقونو په خوندیتوب او حساب و کتاب ورکولو پورې تړلی وي، نه ګواښ ته د انسانانو په لېږلو.
د هغې په وینا، اروپايي هېوادونه له یوې خوا د طالبانو له لوري د بشري حقونو سرغړونو په غندلو او له بلې خوا د افغان کډوالو په جبري ایستلو سره په همکارۍ کولو خپل اعتبار تر پوښتنې لاندې راولي.
د بښنې نړیوال سازمان په یوه بیانیه کې خبرداری ورکړیو چې د افغان کډوالو ستنول یوه داسې هېواد ته چې «له پخوا څخه هم خطرناک» شوی دی، د منلو وړ نه ده.
طالبانو د ۲۰۲۱ په اګست کې له واک ته رسېدو وروسته تر نن پورې، له شپږم ټولګي بره نجونې له زده کړو بندې کړې، د ښځو تګ راتګ یې محدود کړی او د «امربالمعروف» په نوم قوانینو سره یې د ښځو کار او د بیان آزادي په شدت سره را کمه کړې ده.
