د اروپايي ټولنې د پارلمان غړې روشل ګارسیا هرمیدا د اروپا پارلمان په علني غونډه کې، بروکسل ته د طالب پلاوي د بلنې له امله، له افغانانو بښنه وغوښته.
رخشانه: روشل ګارسیا هرمیدا له اروپايي ټولنې سره د طالبانو له لیدنې یوه ورځ وروسته، د اروپايي ټولنې پارلمان په یوه علني غونډه کې و ويل: دا ګام «لویه تېروتنه» وه او د اروپا پارلمان ونه توانېده، چې د ۴۵۰ میلیونه اروپايي وګړو مقام څخه «د یوې ترهګرۍ ډلې له عادي کولو» دفاع وکړي.
هغې همدارنګه پر دوام ویلي: اروپایان حق نه لري له نورو غواړي، چې د بشري حقونو او جنسیتي توپیر د موضوع په اړه باور وکړي، په داسې حال کې، چې خپله یې طالبان د خبرو اترو او چای څښلو لپاره بروکسل ته راکشوي.
هرمیدا په سختې نیوکې سره وايي: «دې پارلمان ونه شوای کولی، د دې لېونتوب مخینوی وکړي، د اروپايي سیاست او دیپلوماسۍ په مرکز، په بروکسل کې د طالبانو مېز ته کېنولو لېونتوب. زه بښنه غواړم. موږ هر هغه څه وکړلو چې کولی مو شوای، له دې ځایه غواړم د هغو ښځو غږ شم، چې په افغانستان کې د خبرو کولو حق نه لري.»
د اروپايي کمېسیون له خوا د طالب پلاوي بلنې او د دې ډلې پنځو غړو ته د وېزې ورکړې، په اروپا او د بشري حقونو د فعالانو تر منځ د سختو نیوکو څپه راپورته کړې ده.
اروپايي چارواکو ویلي، دا غونډه «فني» وه او موخه یې د افغان کډوالو بېرته ستنول دي، خو نیوکه کوونکي وايي، له طالبانو سره هېڅ ډول خبرې «فني» نه دي او هره رسمي لیدنه، په ضمني ډول د دې ډلې د منلو په مانا دي.
همدارنګه د اروپايي پارلمان غړې ډاکتر هانا نویمن پرون په یوه جلا بیانیه کې اعلان وکړ، چې طالبانو په ۲۰۲۱ کې د اروپايي ټولنې ټاکل شوي هېڅ یو معیار نه دی رعایت کړی او په دې موده کې یې د ښځو او نجونو حقونه په پراخه کچه محدود کړي دي.
هغې ویلي، اروپا نه باید خپل اصول، د توافق له لارې د کډالو د ایستلو لپاره پرېږدي.
له دې لیدنې وړاندې د اروپايي پارلمان لږ تر لږه ۲۵ تنو غړو، د المان د بوندستاګ او افغانستان د پارلمان پخوانیو استازو، د اروپايي کمېسیون مشر اورزولا فون در لاین او د بلجیم لومړي وزیر بارت د وور، څخه غوښتي وو، چې له طالبانو سره د اروپايي ټولنې لیدنه ودروي.
په ورته وخت په اورپا او افغانستان کې یو شمېر معترضو مېرمنو د یوې بیانیې په خپرولو او اعتراضي غونډو سره دغه بلنه «افغان ښځو او نجونو ته سپکاوی» بللی وو.
دې ښځو ټينګار وکړ، چې طالبانو په تېره نېږدې پنځه کلنه واکمنۍ کې، له زده کړې، کار او اساسي خپلواکیو څخه په محرومولو سره، په نړۍ کې د ښځو ځپلو یو تر ټولو سخت نظام رامنځ ته کړی دی.
د نیوکو له زیاتېدو وروسته، ځینې اروپايي سیاستوالو، طالبانو ته د وېزې ورکړې په تګلاره کې د روڼتیا غوښتنه وکړه.
