دایکنډي ولایت کې ځايي سرچینې وايي، طالب ځواکونو په مرکز بندر کې د نجونو د یوه ښوونځي آمره د ځیرک تلېفون نه ورسپارلو په تور نیولې ده.
رخشانه: د دایکنډي ولایت بندر او سنګ تخت ولسوالۍ کې دوه سرچینو د هویت پټ ساتلو سره په رخشانې رسنۍ ته ویلي، طالب ځواکونو د دوشنبې (چنګاله اولې) په ورځ د ځیرک تلېفونونو ټولولو په موخه د نجونو یوه ښوونځي ته ورغلي او د دې ښوونځي مشره یې ونیوه.
د سرچینې په وینا، دا ښځه له څو ساعته بند وروسته، د دوشنبې په ماښام خوشي شوې ده.
سرچینه وايي، نیول شوې ښځه طیبه حافظي، په مرکز بندر کې د نجونو د لېسې مشره وه.
سرچینې زیاتوي، نوموړې وروسته له هغې ونیول شوه، چې طالب ځواکونو ته یې د ورسره ځيرک تلېفون له سپارلو ډډه وکړه.
یوې بلې سرچینې هم ویلي، طالب ځواکونو د وسلې په زور د دویم او درېیم ټولګي زده کوونکې غوښتې وې، تر څو هغه پټ ځایونه وروښيي، چې زده کوونکو نجونو په کې خپل تلېفونونه پټ کړي وو.
دا سرچینه زیاتوي، طالبانو له دې پېښې مخکې په شفاهي ډول د دولتي ادارو، پوهنتونونو او ښوونځیو کارکوونکو ته د ځیرک تلېفون نه کارولو او راوړلو ویلي وو.
د طالبانو په ملکي او نظامي ادارو کې د ځیرک تلېفون نه کارول او نه راوړلو امر، د لومړي ځل لپاره د ۱۴۰۱ د تلې میاشتې په ۲۷ مه نېټه، په پنجشېر ولایت کې صادر شو او وروسته یې لمن نورو ولایتونو ته پراخه شوه.
ویل کېږي د ځیرک تلېفونونو نه کارولو امر د طالبانو د مشر ملا هبت الله اخوندزاده له خوا صادر شوی دی.
په وروستیو اوونیو کې هم د طالبانو یو شمېر غړو د دې فرمان څخه په ملاتړ، داسې ویډیوګانې خپرې کړې، چې په هغو کې خپل ځیرک تلېفونونه ماتوي.
