د افغانستان پېژندل شوې ښځینه اداکارې شهربانو سادات وايي، په خپل نوي فلم «هېڅ ښه سړي شتون نه لري» سره یې په یوه ورځ کې د اسپانیا او فرانسې درې سینمايي جایزې ګټلې دي.
رخشانه: مېرمن سادت نن (یکشنبې د چنګاښ ۷ مه) په خپله فسبوک پاڼه د یوه انځور په خپرولو سره، د دې درې سینمايي جایزو د ګټلو خبر ورکړی دی.
دې پېژندل شوې اداکارې لیکلي، چې په «ښه سړي شتون نه لري» فلم سره یې په اسپانیا کې د «سینما جوه» په نوم د والنسیا نړیوال فلم فیستوال کې د «غوره اداکارې» او د «نندارچیانو جایز» وګټله.
همدارنګه هغې لیکلي، د دې فلم فرانسه کې د «بیاریتز- موج نو» فلم فیستوال کې د «منصفه پلاوي جایزې» ګټونکی شوی دی.
سادات په یوه ورځ کې د «ښه سړی شتون نه لري» فلم لپاره د دریو سینمايي جایزو ګټل «یو حیرانوونکې پېښه» بللې ده.
د افغانستان ځوانې اداکارې شهربانو سادات، څو لنډ او اوږده سینمايي فلمونه جوړ کړي دي. هغه د «روزنتون، لېوه او پسه» سینمايي فلمونو سره مشهوره شوې ده.
دغه افغان ښځینه اداکارې په ۲۰۱۶ میلادي کال کې د «لېوه او پسه» په نوم خپل لومړنی انځوریز فلم په جوړولو سره د «سیمنا هنر» جایزه وګټله.
د هغې وروستی سینمايي فلم «ښه سړی شتون نه لري» یو رومانټیکه خندونونکې ډرامه ده، چې د روان کال په فبرورۍ کې یې د برلین په نړیوال فلم فیستوال کې لومړنۍ ننداره وشوه.
