د افغان کډوالو ښځینه کرکټ لوبډلې برېتانیا ته تر سفر وروسته، په دوه دوستانه لوبو کې د برېتانیا وسله والو ځواکونو ښځینه لوبډلې او د کمبرېج پوهنتون ښځینه لوبډلو سره میدان ته ښکته شوې او دواړې لوبې یې سیالو لوبډلو ته وبایللې.
رخشانه: د افغان کډوالو ښځینه کرکټ لوبډلې دویمه دوستانه لوبه پرون شنبې (د چنګاښ ۶ مه) له ماسپښين وروسته، کمبرېج ښار کې تر سره شوه، چې د کمبرېج پوهنتون لوبډلې په بریا پای ته ورسېده. دا لوبه په ۱۸ اور کې د ۹ ویکټو په لاسه ورکولو او د ۱۲۵ منډو په کولو سره د کمبرېج پوهنتون ښځینه لوبډلې په ګټه پای ته ورسېده.
د افغان کډوالو ښځینه کرکټ لوبډلې او د برېتانیا د کمبرېج پوهنتون ښځینه کرکټ لوبډلې یوه ۲۰ اوریزه لوبه تر سره کړه.
د افغان کډوالو د ښځینه کرکټ لوبډلې لومړۍ لوبه هم پرون سهار د برېتانیا وسله والو ځواکونو د ښځینه لوبډلې په وړاندې تر سره شوه، او د ۵۲ منډو په توپیر د دې لوبډلې په بریا پای ته ورسېده.
د دې دواړو لورو تر سره کولو موخه یوازې دا وه، چې د افغان کډوالو ښځینه کرکټ لوبډله، د دې لوبډلې د غړو له کډوالۍ وروسته میدان ته راووځي. دا لوبه د شنبې ورځ د ۲۰۲۶ کال د جون په ۲۷ مه د کمبرېج پوهنتون په کوربتوب د هیوزهال پوهنځۍ په تاریخي ځمکه فنرز (Fenner’s) باندې تر سره شوه.
د دې لوبې جوړونکي او ملاتړي له هغې جملې د کمبرېج او کوربه کالجونو مسوولینو ټینګار وکړ، چې د دې لوبې موخه یوازې ورزشي سیالي نه وه، بلکې له افغان ښځو سره پیوستون او د ورزش لپاره د هغوی له حقونو دفاع وه.
په افغانستان کې د برېتانیا وروستي سفیر او د هیوزهال پوهنځۍ رییس لوري برېستو و ویل، هیله ده، دا لوبه دا پیغام د افغانستان په داخل کې ښځو او نجونو ته ورسوي، چې «نړۍ د دوی تر څنګ ده.»
ښاغلي برېستو و ویل: «دا لوبې د دې تر څنګ چې د ښځو سپورت ته درناوی او د افغان ښځینه کرکټ لوبغاړو د استقامت او لاسته راوړنو ستاینه شوه، دغه لوبلړۍ د کورنیو، د ورزش د مینه والو، د پوهنتون غړو او ځايي ټولنې ته د لوبډلو د ملاتړ زمینه هم برابره کړه.»
تېره اوونۍ د برېتانیا پادشاه درېیم شاه چارلز، د افغان کډوالو د ښځینه کرکټ لوبغاړو سره ولیدل او له هغو یې ملاتړ وکړ.
د دې سیالیو د نندارچیانو تر منځ د بشري حقونو یو شمېر فعالانو له هغې جملې د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ او د بشري حقونو یو شمېر جلا وطنه افغان ښځو هم ګډون کړی وو.
د افغانستان د کرکټ ښځینه لوبډله په ۲۰۱۰ کال کې جوړه شوه، خو د ۲۰۲۱ په اګست کې واک ته بیا د طالبانو په رسېدو سره یې خپل رسمي مقام له لاسه ورکړ.
د طالبانو په بیا واکمنېدو سره د دې لوبډلې غړي استرالیا ته کډه شول او خپله لومړۍ سیالي یې د ۲۰۲۵ په جنورۍ کې د دې هېواد په ملبورن ښار کې تر سره کړه.
د ښځینه کرکټ لوبډلې یوې غړې فیروزه امیري رخشانې رسنۍ ته ویلي، که څه هم دا لار د دوی یوې لپاره هم آسانه نه وه، خو کرکټ وکولای شوای دوی سره راټولې کړي او تر یوې کچې پورې یې اړیکې او پیوستون تر منځ رامنځ ته کړي.
هغې ویلي: «موږ د هېڅ حق له ټاکلو پرته، د طالبانو له بیا واکمنېدو وروسته افغانستان پرېښود. موږ خپل هېواد په تر ټولو حشتناکه توګه پرېښود، دا د بیان وړ نه ده، چې بېرته د لوبې ډګر ته راشم.»
د افغانستان د ښځینه کرکټ لوبډلې ډېری غړو په ۲۰۲۱ کال کې د طالبانو له واکمنېدو وروسته، له کورنیو سره، استرالیا ته کډوال شول. د نجونو لوبډلې چې برېتانیا ته سفر کړي، د افغان ښځینه کرکټ هغه لوبغاړې دي، چې په استرالیا، برېتانیا او کاناډا کې ژوند کوي.
د کرکټ نړیوالې شورا (ICC) د تېر میلادي کال په اپرېل کې، د افغانستان د جلا وطنه ښځینه کرکټ لوبغاړو لپاره د ملاتړ ځانګړې کاري ډله رامنځ ته کړه. د افغان ښځینه کرکټ لوبډلې د لوبغاړو غوښتنه دا ده، چې له دې وروسته وکولی شي په نړیوالو لوبو کې کډون وکړای شي.
