پاکستان کې د افغانستان د رنګین کمان ټولنې (LGBTQIA+) لسګونو غړو په یوه لیک کې له ملګرو ملتونو، د بشري حقونو له نورو بنسټونو او دولتونو غوښتي، چې د دې ډلې د غړو وضعیت او ملاتړ ته پاملرنه وکړي.
رخشانه: د دې ټولنې غړو پرون (شنبې د چنګاښ ۶ مه) ملګرو ملتونو، د کډوالو په چارو کې د ملګرو ملتونو عالي کمېشنرۍ، اروپايي ټولنې او د دې ټولنې غړو هېوادونو، د بشري حقونو نړیوالو بنسټونو او د (LGBTQIA+) د حقونو مدافع سازمانونو ته یو لیک استولی دی.
دوی په دې لیک کې لیکلي، چې په پاکستان کې د افغانستان رنګین کمان ټولنه، چې د (LGBTQIA+) له شاوخوا ۳۰۰ کډوالو جوړ ده، په وېره او افغانستان ته د ایستلو په ګواښ کې ژوند کوي.
پاکستان کې د افغانستان د رنګین کمان ټولنې غړو زیاته کړې چې دوی «د خپل جنسي تمایل یا جنسیتي هویت له امله د افغانستان څخه وتلو ته اړ شوي دي.»
دوی ټینګار کړی، چې د طالبانو تر بیا واک ته رسېدو وروسته، افغانستان د LGBTQIA+ کسانو لپاره د نړۍ یو له تر ټولو خطرناکو هېوادو باندې تبدیل شوی دی.
د دې ټولنې غړو ویلي، چې دوی د «خپل واقعي توب» په دلیل ښايي د طالبانو له خوا له خپل سرې نیونې، ربړونې، جنسي تېري، اجباري ودونو، ورکېدو او یا مرګ سره مخ شي.
دوی لیکلي، پاکستان کې د دې ټولنې غړي بې برخلیکه پاتې دي او هره ورځ افغانستان ته ستنولو او جبري ایستو له ګواښ سره مخ دي.
پاکستان کې د افغانستان د رنګین کمان ټولنې ویلي، چې د دې ټولنې ډېری غړي، د رشوت اخیستو، تبعیض، تاوتریخوالي، ځورولو، بې کورۍ، سختې بېوزلۍ او جدي رواني ستونزو قرباني دي.
دوی د المان فدرالي جمهوریت، اروپايي ټولنې او ټولو هغو دولتونو، چې د بشري حقونو او له خطر سره مخ خلکو ملاتړ کوي، غوښتي، چې د دې ټولنې د غړو ملاتړ وکړي.
په پاکستان کې د افغانستان د رنګین کمان ټولنې غړو په ملګرو ملتونو، اروپايي ټولنې، د آلمان دولت او د بشري حقونو سازمانونو څخه غوښتي، چې د کډوالو په ځانګړې توګه د دې ټولنې د غړو د نیول کېدو او افغانستان ته د ستنولو مخنیوی وکړي.
همدارنګه دوی د کیسونو د بیاکتنې، بیا مېشتېدنې او د کډوالو دوست هېوادونو ته د لېږد لپاره د خوندي او قانوني لارو چارو پراخولو پروسې د ګړندیتوب غوښتنه هم کړې ده.
