د روادارۍ بشري حقونو بنسټ پر پکتیا، پکتیکا او کونړ ولایتونو د پاکستان د یکشنبې شپې هوايي بریدونه، چې په کې ۲۸ تنه وژل شوي او ۱۷۶ ټپیان دي، په کلکو ټکو وغندل.
رخشانه: دې بنسټ نن (سه شنبې د چنګاښ ۹ مه) په خپله اېکس پاڼه د یوې اعلامیې په خپرولو سره لیکلي، چې د دې پېښې په قربانیانو کې ښځې او ماشومان هم شامل دي.
رواداري لیکلي: «پکتیا کې بریدونه دوه ځلې تر سره شوي، لومړۍ څپه کې د استوګنې یو کور په نښه شوی او په دویمه څپه کې هغه کسان په نښه شوي، چې تر خاورو لاندې کسانو د ژغورلو هڅه یې کوله او دا برید د ملکي مرګ ژوبلې سبب شوی دی.»
دې بنسټ د استوګنې پر ځایونو بریدونه او ملکي وګړو ته مرګ ژوبله اړول د نړیوالو بشري حقونو د قوانینو ښکاره سرغړونه وبلله وايي، دا بریدونه کېدای شي جنګي جنایت وبلل شي.
رواداري زیاته کړې، د ملکي وګړو او مرستندویه کسانو په نښه کول، په ځانګړې توګه د نړیوال بشري قانون او جینوا د څلورو کنوانسیونونو کې د توپیر، احتیاط او اړتیاوو له اصولو سرغړونه ده.
د دې بنسټ په وینا، د جګړې ښکېلې غاړې مکلفې دي، چې د نظامي او غیر نظامي موخو تر منځ توپیر وکړي او د زیاتو زیانونو د مخنیوي لپاره، په ځانګړې توګه ملکي وګړو ته د زیان کمولو لپاره ټول ممکنه اقدامات تر سره کړي.
رواداري د پکتیا، پکتیکا او کونړ ولایتونو د استوګنې په سیمو د پاکستاني ځواکونو د شنبې شپې هوايي بریدونه په کلکه وغندل او پر ملکي وګړو د دې ډول بریدونو پر دوام یې اندېښنه وښوده.
د بشري حقونو دې بنسټ له نړیوالې ټولنې او نړیوالو بنسټونو غوښتي، چې د دې پېښو په کره مستند کولو سره، محاکمې ته د دې پېښې د عاملینو کشولو لپاره بېړني اقدامات وکړي.
یوناما پرون په پکتیا، پکتیکا او کونړ ولایتونو د پاکستان د یکشنبې شپې هوايي بریدونو کې د ۲۸ تنو د وژل کېدو او د ښځو او ماشومانو په ګډون د ۴۹ تنو د ټپي کېدو پخلی وکړ.
یوناما په افغانستان کې پر ملکي وګړو د پاکستان هوايي بریدونه وغندل او نړیوالو قوانینو ته د درناوي غوښتنه یې کړې.
د افغانستان لپاره د برېتانیا ځانګړي استازي ریچارد لېندسي، د افغانستان د بشري حقونو لپاره د ملګرو ملتونو ځانګړي راپور ورکونکي ریچارد بنټ، د افغانستان لپاره اروپايي ټولنې او یونیسف هم دې بریدونو ته غبرګون ښودلی او د جګړې له ښکېلو غاړو یې غوښتي، چې نړیوالو بشري قوانینو ته درناوی وکړي او د غیرنظامیانو خوندیتوب ته ژمن و اوسي.
