د افغانستان د بشري حقونو مرکز (AHRC) وايي، طالبانو ځواکونو د دې ډلې د عدلیې وزیر په امر، کابل ښار کې ۲۶ شیعه ګان نیولي او زنداني کړي او ۹ تنه یې د محرم د بیرغونو ځړولو په تور نیولي دي.
رخشانه: دې مرکز پرون سه شنبې د (سرطان ۹مه) په یوه اعلامیه کې د محرم میاشتې د عاشورا پر ماتم کوونکو او د شیعه ګانو په تکیه خانو محدودیتونه په کلکه غندلي دي.
د دې مرکز په اعلامیه کې راغلي، د طالبانو له لوري د محرم په مراسمو کې د مذهبي آزادۍ څخه سرغړونه، د بشري حقونو د بنسټزو حقونو تر پښو لاندې کول دي.
یاد مرکز وايي، د طالبانو تبعیضي او محدودونکو اقداماتو کې د ماتم کوونکو نیول، په مذهبي ځایونو چاپې وهل، د ماتم سبمولونه لرې کول، د مذهبي مراسمو سخت محدودول او خلکو او خبریالانو لپاره د مزاحمت رامنځ ته کول، له حقوقي او شرعي ژمنو ښکاره سرغړونه شمېرل کېږي.
د بشري حقونو مرکز زیاتوي، طالبانو د دې ډلې د عدلیې وزیر په امر کال ښار کې له یوې تکیه خانې لږ تر لږه ۲۶ تنه شیعه ماتم کوونکي نیولي او هغوی یې په شخصي زندان کې بندي کړي.
دغه مرکز زیاته کړې، همدارنګه طالبانو لږ تر لږه ۹ تنه نور یوازې په دې دلیل چې د محرم بیرغونه یې ځړولي وو، کابل کې په څو جوماتونو چاپې وهلې او مذهبي بیرغونه یې ټول کړي دي.
یاد مرکز زیاتوي، طالبانو د شیعه علماو پلاوي ته، چې غوښتل یې د ستونزو د حل لپاره د دې ډلې له لوړ پوړو چارواکو سره خبرې وکړي، هم ناسم چلند کړی دی.
د بشري حقونو مرکز همدارنګه لیکي، طالبانو په هرات ښار کې هم پر سړونو د مراسمو تر سره کولو، د ماتم بیرغ او سمبولونو لېږدول بند کړي او یوازې د عاشورا د ورځې په پار یې په محدودو ټاکل شویو ځایونو کې د مراسمو اجازه ورکړې.
دې مرکز زیاته کړې، طالبانو په بلخ، غزني او بامیان ولایتونو کې هم د عاشورا پر مراسمو محدودیتونه لګولي او د ځینو تکیه خانو او جوماتونو مسوولین یې نیولي دي.
د افغانستان د بشري حقونو د مرکز په خبره، طالبانو د کابل دشت برچي سیمه کې یوه ښځینه خبریاله، د محرم مراسم د رسنیز پوښښ پر مهال نیولې او ناسم چلند یې ورسره کړی دی.
دغه مرکز وايي، د مذهب پر بنسټ هر تبعیض کوونکی اقدام د عدالت له اصولو سره په ټکر کې دی او خپل سرې نیولې، د نورو دیني شعائرو ته سپکاوی او د مذهبي مناسکو تر سر کولو پر مهال خنډونه رامنځ ته کول، هېڅ شرعي بنسټ نه لري.
د افغانستان د بشري حقونو مرکز د شیعه ګانو په مذهبي مراسمو او د نورو دیني او مذهبي لږکیو پر مراسمو د محدودیتونو ژر تر ژره درولو غوښتنه کړې ده.
