د « آسیا او آرام سمندر لپاره د اروپايي ټولنې د بشردوستانه مرستو» دفتر وايي، د طالبانو تر واک لاندې افغانستان کې د میندو روغتیا له جدي بحران سره مخ ده.
رخشانه: دې بنسټ پرون جمعه (د چنګاښ ۱۲ مه) په خپله اېکس پاڼه د یوه پوسټ په خپرولو سره افغانستان کې د میندو د روغتیايي وضعیت د لا خرابېدو په اړه خبرداری ورکړی دی.
دغه دفتر لیکلي، د ښځو په زده کړو د طالبانو محدودیتونو او روغتیايي خدماتو ته د هغوی محدود لاسرسي هغه وضعیت چې له پخوا بحراني وو لا خراب شوی دی.
څه موده وړاندې افغانستان کې د ملګرو ملتونو د بشري مرستو د همغږۍ دفتر (اوچا) هم په افغانستان کې د ښځو د خراب روغتيايي وضعیت په اړه اندېښنه ښودلې وه.
دې بنسټ په افغانستان کې د منیدو د مړینې لوړې کچې ته په اشارې ویلي، د ښځو په ګډون او د طب په څانګه کې د هغوی پر زده کړو د طالبانو محدودیتونو، حیاتي او ژغورونکو خدماتو ته د میندو او ماشومانو لاسرسی محدود کړی دی.
طالبانو په تېرو نېږدې پنځو کلونو کې، په هېواد کې په ځانګړې توګه د ښځو او نجونو په کار او زده کړو پراخ محدودیتونه لګولي دي. دا مهال ښځې او نجونې اجازه نه لري، چې په نیمه لوړو طبي برخو کې زده کړې وکړي.
د ملګرو ملتونو د راپور له مخې، د نجونو په زده کړو او د ښځو پر کار د طالبانو محدودیتونه به، تر ۲۰۳۰ پورې افغانستان د ۲۵ زره ښوونکو او ښځینه روغتیايي کارکوونکو له کمښت سره مخ کړي.
ملګرو ملتونو په وار وار ویلي، پر زده کړو او ښخینه روغتیايي کارکوونکو د طالبانو محدودیتونو، د افغانستان روغتیايي نظام کمزوری کړی دی.
طالبانو د نورو محدودیتونو سربېره، ناروغانو ته د روغتیايي خدماتو وړاندې کولو تګلاره او په روغتیايي مرکزونو کې د ښځینه روغتیايي کارکوونکو په فعالیت هم محدودیتونه لګولي دي.
د طالبانو د امر سره سم، دا مهال ښځینه روغتیايي کارکوونکې باید له خپل شرعي محرم سره یو ځای روغتیايي مرکز ته لاړې شي او نارینه ډاکتران حق نه لري، چې د ښځینه ناروغانو درملنه وکړي.
