له افغان رسنیو د ملاتړ سازمان د طالبانو له زندانه د بندي خبریالانو د خوشي کېدو غوښتنه کړې او ویلي یې دي، هېڅ یو خبریال نه باید د خپلې دندې تر سره کولو له امله ونیول شي، له وحشت یا زندان سره مخ شي.
رخشانه: دې بنسټ، د طالبانو له زندانه د «پیګرد» خبري آژانس د امتیاز خاوند جاوید نیازي د خوشي کېدو په غبرګون کې لیکلي، د دې خبریال نیول د «بشري حقونو له اصولو سرغړونه» ده.
د افغان رسنیو د ملاتړ سازمان په خپله اعلامیه کې ویلي، نیازی پرون دوشنبې د (چنګاښ ۱۵ مه) له دوه میاشتې بند وروسته د طالبانو له زندانه خوشی شوی دی.
دې سازمان زیاته کړې، د دې خبریال نیول، محاکمه او زنداني کول د بشري حقونو له اصولو او د رسنیو له آزادۍ ښکاره سرغړونه ده.
یاد بنسټ په هېواد کې پر خبریالانو د طالبانو د نیولو، ګواښونو او محدودیتونو پلي کولو باندې اندېښنه ښودلې وايي، هېڅ خبریال نه باید د خپلې دندې له امله، تر تعقیب، وېرې او زندان لاندې وي.
امسو د طالبانو له زندانه د بندي خبریالانو د خوشي کېدو غوښتنه کړې وايي، دا ډله باید «د خبریالانو اساسي حقونو، له هغې جملې د مدافع وکیل لرل، عادلانه محاکمې او د دندې خوندیتوب ته درناوی وکړي.»
له افغان رسنیو د ملاتړ سازمان همدارنګه دا غوښتنه هم کړې، چې طالبان دې «له اجباري اعتراف اخیستو او هر ډول اقدام څخه چې د بشري حقونو سره په ټکر کې وي» ډډه وکړي.
دې سازنان د رسنیو په وړاندې د طالبانو د محدودیتونو له دوام او د خبریالانو د نیولو په اړه خبرداری ورکړی وايي، د اصولو ماتول به «د افغانستان د راتلونکې لپاره زیانمنوونکې پایلې ولري.»
له افغان رسنیو د ملاتړ سازمان همدارنګه له طالبانو غوښتي، چې هېواد کې د رسنیو په وړاندې هر ډول فشار، ګواښ او محدودیت ته د پای ټکی کېږدي.
طالبانو په تېرو نېږدې پنځو کلونو کې پر رسنیو د محدودیتونو په لګولو سره، د دې لامل شوي، چې لسګونه رسنۍ وتړل شي، او څو تنه خبریالان، رسنیز کارکوونکي او فعالان یې نیولي او زنداني کړي دي.
