په «آسیا او ارام سمندر کې د اروپايي ټولنې د بشري مرستو» دفتر، افغانستان کې د لوږې د بحران په اړه خبرداری ورکړی وايي، دې هېواد ته د لوږې بحران را رسېدلی دی.
رخشانه: دې بنسټ (نن سه شنبې د چنګاښ ۱۶ مه) په خپله اېکس پاڼه د یوه پوسټ په کولو سره، په افغانستان کې د لوږې بحران ته د نړۍ د پاملرنې غوښتنه کړې ده.
په «آسیا او ارام سمندر کې د اروپايي ټولنې د بشري مرستو» دفتر لیکلي، د پولو تړل کېدوو، د اکمالاتو په ځنځیرونو کې ګډوډي، د ژوند خرابوالي او د بشردوستانه بودجې کمښت د خوړو د خوندیتوب او تغذیې بحران لا سختوي.
دې دفتر زیاته کړې، نړۍ باید په افغانستان کې د لوږې د بحران د حل لپاره، لا زیاتې مرستې، اقدام او پیوستون سره وکړي.
په افغانستان کې د ملګرو ملتونو د بشري مرستو د همغږۍ دفتر (اوچا) پرون په یوه راپور کې لیکلي وو، د طالبانو تر واک لاندې افغانستان کې به بحران نور د خبرونو سرټکی نه وي، خو د هغې اغېز هره ورځ د میلیونونو کورنیو له خوا احساس کېږي.
اوچا زیاته کړې، د طالبانو تر واک لاندې افغانستان کې ډېری کورنۍ د ژوند اړتیاوو برابرولو برخه کې له ستونزو سره مخ کېږي.
افغانستان کې د مرستندویه بنسټونو سره د امریکا د بودجې تر پرېکدو وروسته، دغه بنسټ، د طالبانو تر واک لاندې افغانستان کې د انساني بحران د رامنځ ته کېدو او سختېدو خبرداری ورکړی وو.
د ملګرو ملتونو د خوړو پروګرام(WFP) د روان لومریز کال په پیل کې، په افغانستان کې انساني بحران ته په اشارې ویلي وو، په افغانستان کې د خپلو ژغورونکو عملیاتو تر سره کولو لپاره، په راتلونکو شپږو میاشتو کې ۳۵۰ میلیون ډالرو ته اړتیا لري.
