له پولیو پاک افغانستان پاڼې اعلان کړی، چې په کندهار ښار او د هلمند ولایت په څو ولسوالیو کې د پولیو یا د ماشومانو د ګذڼ ضد واکسین لړۍ پیل شوه.
رخشانه: دې پاڼې نن (سه شنبې د چنګاښ ۱۶ مه) په خپله اېکس پاڼه د یوې اعلامیې په خپرولو سره لیکلي، د پولیو واکسین کمپاین په کندهار ښار، د هلمند مرکز لښکرګاه ښار او نهرسراج، موسی کلا، واشېر، نادعلي او مارجې ولسوالیو کې پیل شو.
له پولیو پاک افغانستان پاڼې په دې دوه ولایتونو کې له ټولو کورنیو غوښتي، چې له پنځو کلونو کم عمره ماشومان واکسین کړي.
معلومه نه ده، چې د پولیو د کمپاین په دې لړۍ کې به تر پنځو کلونو کم عمره څومره ماشومان په کندهار او هلمند ولایتونو کې واکسین تر لاسه کړي.
د روغتیا نړیوال سازمان څه موده وړاندې په روان میلادي کال کې په هېواد کې د پولیو یا ماشومانو د ګذڼ د دوه مثبت پېښو خبر ورکړی وو او لیکلي یې وو، د دې دوه مثبو پېښو په ثبتېدو سره، روان ۲۰۲۶ کال د پولیو مثبتې پېښې شپږ مورده ته رسېدلې دي.
روان میلادي کال په ټوله نړۍ کې د پولیو د ۹ مثبتو پېښو راپور ورکړل شوی دی، چې ۶ پېښې يې په افغانستان او ۳ نورې یې په پاکستان کې دي.
په ۲۰۲۵ میلادي کال کې د پولیو مثبتې پېښې ۲۵ مورده وې، چې ۲۱ یې په افغانستان او۳۱ نور یې په پاکستان کې ثبت شوې وې.
افغانستان او پاکستان په نړۍ کې دوه هېوادونه دي، چې تر اوسه د پولیو ویروس یا ماشومانو د ګذڼ په لمنځه وړلو نه دي بریالي شوي.
