د افغانستان د بشري حقونو د چارو لپاره د ملګرو ملتونو ځانګړي راپور ورکوونکي ریچارد بنټ د افغان کډوالو ښځینه کرکټ لوبډلې د رسمیت پېژندلو غوښتنه کړې ده.
رخشانه: بنټ نن (چهارشنبې د چنګاښ ۱۷ مه) د کرکټ نړیوالې شورا د کلنۍ غونډې سره سم، د دې لوبډلې د په رسمیت پېژندلو غوښتنه کړې ده.
هغه لیکلي، د افغان کډوالو ښځینه کرکټ لوبډله، چې ۲۰۲۱ کال کې د طالبانو له واک ته رسېدو وروسته، په جلاوطنۍ کې ژوند کوي، تر اوسه په رسمیت نه ده پېژندل شوې.
د افغانستان د بشري حقونو د چارو لپاره د ملګرو ملتونو د ځانګړي راپور په وینا، د دې لوبډلې ملاتړې بوجه، ښايي په اګست میاشت کې پای ته ورسېږي.
هغه د فوټبال نړیوال فدراسیون له خوا د افغان ښځینه فوټبال لوبډلې په رسمیت پېژندلو ته اشاره کړې، وايي د کرکټ نړیواله شورا هم کولی شي، همدا کار وکړي.
بنټ ټینګار کړی: «د افغان کډوالو ښځینه کرکټ لوبډلې په رسمیت پېژندل او له هغوی د ملاتړ دوام، هغه تر ټولو کم اقدام دی، چې باید تر سره شي.»
د افغان کدوالو ښځینه کرکټ لوبډلې غړو د روان لمریز کال په پیل کړې، د کرکټ له نړیوالې شورا له (ICC) څخه د په رسمیت پېژندلو غوښتنه وکړه.
دوی د کرکټ له نړیوالې شورا وغوښتل، چې د فوټبال نړیوال فدراسیون (فیفا) په پله پل کېږدي او دوی د یوې ملي لوبډلې په توګه په رسمیت وپېژني.
په جلاوطنۍ کې د افغان کډوالو د کرکټ ښځینه ملي لوبډلې په دې وروستیو کې برېتانیا ته سفر وکړ او دوه دوستانه لوبې یې د برېتانیا د وسله والو ځواکونو د ښځینه لوبډلې او د کمبرېج پوهنتون له ښځینه لوبډلې سره تر سره او دواړه ولبې یې وبایللې.
د افغانستان د ښځو کرکټ ملي لوبډله په کال ۲۰۱۰ کې جوړه شوه، خو په ۲۰۲۱ میلادي کال کې د طالبانو په بیا واکمنېدو سره یې خپل رسمي ځای له لاسه ورکړ او د دې لوبډلې لوبغاړو په استرالیا کې پناه واخیسته.
