ننګرهار کې ځايي سرچینې وايي، د دې ولایت چپرهار ولسوالۍ کې یو ماشوم اوبو ډوب کړی او ژوند یې له لاسه ورکړی دی.
رخشانه: ننګرهار کې دوه سرچینو ویلي، دا پېښه نن (شنبې د چنګاښ ۲۰ مه) د چپرهار ولسوالۍ په «ګنډي باغ» سیمه کې رامنځ ته شوې ده.
د سرچینو په وینا، یو لس کلن ماشوم چې د سخت ګرمې له امله یې اوبو کې لامبو کوله، خو اوبو ډوب کړی او ژوند یې له لاسه ورکړی دی.
سرچینو زیاته کړې، دا ماشوم هلک، د «اعوذبالله» په نوم د سیمې د یوه اوسېدونکي زوی وو.
تر اوسه ننګرهار کې ځايي طالب چارواکو په دې اړه نظر نه دی څرګند کړی.
دوه اوونۍ وړاندې هم د دې ولایت «ګوشتې» ولسوالۍ کې یو پلار او لور د کونړ سیند کې ډوب او ژوند یې له لاسه ورکړی وو.
د هوا له ګرمېدو وروسته، په ننګرهار او د هېواد په یو شمېر نورو ګرمو ولایتونو کې ورته څو پېښو د یو شمېر کسانو ژوند اخیستی دی.
