افغانستان کې د ملګرو ملتونو د سیاسي استازولۍ (یوناما) دفتر وايي، په افغانستان کې د ماشومتوب واده او اتلس کلنۍ ته تر رسېدو مخکې د نجلۍ واده ننګونه لا هم پر ځای پاتې ده.
رخشانه: یوناما نن (شنبې د چنګاښ ۲۰ مه) د «نفوس نړیوالې ورځې» سره سم په خپل فسبوک پاڼه لیکلي، میلیونونه افغان نجونو لا هم د ژوند له ګڼو ستونزو سره مخ دي.
د ملګرو ملتونو د سیاسي استازولۍ دفتر په خپله اعلامیه کې ویلي، د افغانستان په یو شمېر ولایتونو کې د کم عمره نجونو تر منځ د زېږون کچه لوړه ده.
دې بنسټ زیاته کړې، افغانستان د نفوس په برخه کې د پام وړ ستونزو سره مخ دی.
یوناما په افغانستان کې د نفوس ننګونې «اقلیمي بدلونونه، وچکالي، سېلابونه، د هوا ګرمېدل او د اوبو کمښت» بللی وايي، دې ننګونو په دې هېواد کې د ملیونونو کسانو ژوند تر اغېز لاندې راوستی دی.
د یوناما په وینا، د افغانستان د ۷۵ سلنه وګړو ژوند په کرنه او مالدارۍ پورې تړلی او د اقلیمي بدلونونو پایلو، په دې هېواد کې د میلیونونه کسان زیانمن کړي دي.
افغانستان کې د ملګرو ملتونو د سیاسي استازولۍ دفتر په ۲۰۲۶ کې د افغانستان نفوس ۴۸.۶ میلیونه وګړي اټکل کړی دی.
د ملګرو ملتونو په وینا، روغتیا، حقونه او برابر فرصتونه، به د میلیونونه ښځو، نجونو او ځوانانو لپاره د افغانستان راتلونکې جوړه کړي.
ملګرو ملتونو د یوې داسې ټولنې د رامنځ ته کولو لپاره پر خپلې ژمنې ټيڼګار کړی، چې هر وګړی په کې د ودې، ګډون، د یوې باثباته، ټول شموله او انعطاف وړ راتلونکې په جوړلو کې د ګډون فرصت ولري.
