د «افغانستان د خپلواکۍ غوښتونکو ښځو بنسټ» غړو د کانکور ازموینې د پایلو اعلان ته، چې د څلورم پرلپسې کال لپاره د نجونو له شتون پرته تر سره شو، په غبرګون کې وايي، له زده کړو د ښځو محرومیت د بشري حقونو څخه ښکاره سرغړونه ده.
رخشانه: د دې اعتراضي غورځنګ غړو نن (شنبې د چنګاښ ۲۰ مه) د یوې اعلامیې په خپرولو سره «د نجونو زده کړې ته د لاسرسي مسلم او نه انکار کېدونکي حق» باندې ټینګار کړی دی.
د «افغانستان د خپلواکۍ غوښتونکو ښځو بنسټ» غړو ویلي، له زده کړو د میلیونونه نجونو محرومیت د بشر له اساسي حقونو ښکاره سرغړونه او د انساني ظرفیت له لویې برخې د افغانستان محرومول دي.
معترضو ښځو په خپله اعلامیه کې د نجونو په زده کړو د طالبانو محدودیتونو ته په اشارې لیکلي، د دې وضعیت دوام، د یوه نسل راتلونکې او د هېواد راتلونکې له جدي ننګونو سره مخ کړې ده.
د افغانستان د خپلواکۍ غوښتونکو ښځو بنسټ له نړیوالې ټولنې او د بشري حقونو له مدافع بنسټونو غوښتي، چې په افغانستان کې د نجونو په زده کړو د طالبانو پر محدودیتونو خوله پټه نه کړي.
د دې بنسټ غړو د میلیونونه افغان نجونو او ښځو د زده کړې په حق ټينګار کړی او له نړیوالې ټولنې یې غوښتي، چې د نجونو د زده کړې حق د خوندیتوب لپاره ګټور او عملي ګامونه پورته کړي.
۱۵۷۲ ورخې کېږی، چې افغانستان له کې له شپږم ټولګي بره نجونې د طالبانو د محدودیتونو له امله، ښوونځي ته له تګه محرومې دي. همدارنګه طالبانو د پوهنتونو دروازې هم د نجونو پر مخ تړلې دي.
سره له دې، چې ملګرو ملتونو، د بشري حقونو بنسټونو او د زده کړو او ښځو د حقونو مدافعانو په وار وار غوښتي، چې په هېواد کې د ښځو او نجونو په وړاندې محدودیتونه پای ته ورسوي، خو دې ډلې کوم اقدام نه دی کړی.
