پنجشېر کې ځايي طالب چارواکي وايي، د دې ولایت حصه اول ولسوالۍ کې څلور تنه ماشومان موټر وهلي او ژوند یې له لاسه ورکړی دی.
رخشانه: پنجشېر کې د طالبانو د والي ویاند سیف الدین لټون ځايي رسنیو ته ویلي، دا پېښه پرون جمعه (د چنګاښ ۱۹ مه) د حصه اول ولسوالۍ په «غمرض» سیمه کې رامنځ ته شوې ده.
لټون وايي، کرولا ډوله موټر چلوونکي څلور ماشومان په موټر وهلي، چې څلور واړو ژوند له لاسه ورکړی دی.
هغه زیاته کړې، دا ماشومان روغتون ته تر لېږدولو وروسته مړه شوي دي.
دا پېښه د موټر چلوونکي د ګړندي تګ او بې احتیاطۍ له امله رامنځ ته شوې ده.
پنجشېر کې د طالبانو د والي ویاند د وژل شویو ماشومانو د جنسیت او عمر په اړه څه نه دي ویلي.
موټر چلوونکی پنجشېر کې د طالبانو د امنیتي ځواکونو له خوا نیول شوی دی.
له دې وړاندې هم د هېواد په یو شمېر ولایتونو په ځانګړې توګه پنجشېر کې ورته پېښې رامنځ ته شوې، چې د ماشومانو په ګډون یې له هېوادوالو قرباني اخیستې ده.
څه موده وړاندې هم یوه کرولا ډوله موټر کابل کې څلور تنه نجونې وهلې وې، چې سختې ټپیانې شوې وې.
کابل کې ځايي سرچینو ویلي وو، دا موټر د یوه طالب چارواکي د زوی اړوند وو.
