افغانستان کې د ملګرو ملتونو له ماشومانو د ملاتړ صندوق (یویسف) وايي، ۳.۷ میلیونه افغان ماشومانو د خوراځوکۍ له زیات خطر سره مخ دي.
رخشانه: دې بنسټ پرون یکشنبې د (د چنګاښ ۲۱ مه) په یوه راپور کې، د طالبانو تر واک لاندې افغانستان کې د سختې خوراځواکۍ او خوړو د نه خوندیتوب په اړه خبرداری ورکړی دی.
د ملګرو ملتونو د ماشومانو د ملاتړ صندوق په راپور کې ویل شي، افغانستان د سختې خوارځواکۍ فصل ته د ننوتو په حال کې دی. د یونیسف په وینا، د ۲۰۲۵ په پرتله د سختې خوارځواکۍ کچه په ۲۶ ولایتونو کې زیاته شوې ده.
یونیسف ویلي، له دوه کلونو کم عمر ماشومان تر ډېره له دې وضعیت څخه زیان لیدلی، په داسې ډول چې خوراځواکي ۸۳ سلنه او د منځنۍ کچې خوارځواکي ۷۷ سلنه جوړوي.
افغانستان کې د یونیسف استازي تاج الدین اویوالي ویلي، افغانستان کې کم عمره ماشومان ان د سختې خوارځواکۍ د څپرکي له پیل وړاندې، مخکې له مخکې د خوارځواکۍ خواته سوق کېږي.
هغه زیاته کړې: «کله چې کورنۍ د خوړو وختونه راکموي یا د مغذي خوړو مصرف محدودوي، دا نه یوازې د سختۍ نښه ده، بلکې یو خبرداری هم دی، چې ماشوم به ډېر ژر په شدیده خوارځواکۍ اخته شي.»
یونیسف په خپل راپور کې لیکلي، په افغانستان کې د خوارځواکۍ له بحران سره مبارزه باید یوازې د تغذيي په خدمتونو پورې محدوده نه وي.
دغه بنسټ وايي، د کم عمره ماشومانو پر ناسم خوراک او د خوړو د خوندیتوب پر زیاتوالي سربېره، د ناروغیو خپرېدل، د واکسینونو کم پوښښ، د اوبو کمښت، د روغتیا او روغتیا ساتنې د خدمتونو کمښت او د بودیجې او تجهریاتو نشتوالی، هغه عوامل دي، چې په افغانستان کې د خوارځواکۍ د زیاتېدو لامل کېږي.
د یونیسف په وینا، د دې عواملو ټولګه د شدیدې خوارځواکۍ په وړاندې د ماشومانو زیان مننه زیاتوي او د تغذیې، روغتیا، اوبو، روغتیا ساتنې، تعلیم او ټولنیز ملاتړ په برخو کې د همغږۍ اقدام اړتیا په ګوته کوي.
حاده خوارځواکي د وژونکې خوارځواکۍ یو ډول دی، چې په هې کې ماشوم د قد په پرتله ډېر لږ وزن لري او که په وخت یې درملنه ونه شي، دا ژر تر ژره د ماشوم ژوند له ګواښ سره مخ کولی شي.
یونیسف د کم عمره ماشومانو د تغذیې د ساتنې او په خوارځواکۍ د اخته ماشومانو د شمېر د زیاتېدو د مخنیوي لپاره د بېړنۍ پانګونې غوښتنه کوي، په ځانګړې توګه په افغانستان کې د سختې خوارځواکۍ د لوړ فصل له پیلېدو مخکې.
