ننګرهار کې ځايي سرچینې وايي، طالبانو د دې ولایت مرکز جلال آباد ښار کې د کورنیو تولیداتو په یوه نندارتون کې د ښځینه سوداګرو مخنیوی کړی او نارینه وو د ښځو لاسي صنایع پلورلې.
رخشانه: دا نندارتون پرون یکشنبې د (چنګاښ ۲۱ مه) د کورنیو تولیداتو او محصولاتو د پېژندنې په موخه، د ننګرهار ولایت مرکز جلال آباد ښار کې پرانستل شو او تر سبا (سه شنبې) پورې به دوام ولري.
په دې درې ورځني نندارتون کې، خوراکي توکي، کرنیز محصولات، غالۍ، د ښځو لاسي صنایع او نور ټول کورني محصولات په ۸۰ غرفو کې نندارې ته وړاندې شوې دي.
جلال آباد ښار کې ځايي سرچینې وايي، طالبانو ښځینه سوداګرو ته په دې نندارتون کې د ګډون اجازه ورنه کړه او د ښځو لاسي صنایع د نارینه وو له خوا پلورل کېږي.
د سرچینو په وینا، له نندارتون نه د ښځینه سوداګرو مخنیوي، د ښځو د لاسي صنایعو او د هغوی د محصولاتو په پلور او بازار موندنې باندې منفي اغېز کړی دی.
خلکو پر سوداګرو ښځو او ښځینه ننداره کوونکو د طالبانو لګول شوي محدودیتونو بې عدالتي بللې وايي، دا محدودیت ننګرهار کې سوداګرو ښځو په حق کې ښکاره ظلم دی.
یوه ملي سوداګر د هویت پټ ساتلو سره رخشانې رسنۍ ته ویلي، ښځینه سوداګرې د خپل ژوند د اړتیاوو د لګښتونو پوره کولو لپاره، لاسي صنایعو ته مخه کړې، خو د وړ بازار د نه شتون له امله، له سختو ننګونو سره مخ دي.
هغه زیاته کړې، که ښځو ته دا اجازه ورکړل شي، چې په دې ډول نندارتونونو کې حضور ولري، نو د اقتصادي فعالیتونو د دوام لپاره به د هغوی انګېزه او وړتیا لا زیاته شي.
ننګرهار کې ځايي طلب چارواکو تر اوسه په جلال آباد ښار کې د کورنیو تولیداتو په نندارتون کې د سوداګرو ښځو او ښځینه ننداره کوونکو د بندیز په اړه څه نه دي ویلي.
پرون په بلخ کې هم سرچینو ویلي وو، طالبانو د «مولانا جلال الدین بلخي په درېیم ملي او نړیوال نندارتون» د جنسیتي جلاوالي سره پرانستی او رسنیو ته یې د انځور اخیستو اجازه نه ده ورکړې.
په دې نندارتون کې د ښځینه او نارینه وو غرفې، د جنسیت جلاوالي سره په بېلو ځایونو کې په پام کې نیول شوې وې او نارینه کتونکو ته ښځینه برخې ته او ښځینه کتونکو ته نارینه برخې ته د ورتګ اجازه نه وه.
