د اسلامي همکاریو سازمان (OIC) د ښځو چارو وزیرانو نهمه غونډه، د زده کړې په حق او د افغان ښځو او نجونو په وړاندې د طالبانو د محدودیتونو د لغوه کولو په ټينګار سره پای ته ورسېده.
رخشانه: دا ناسته د (چنګاښ په ۲۱ مه او ۲۲ مه) د پاکستان پلازمېنه اسلام آباد کې د «اسلامي همکاریو سازمان په غړو هېوادونو کې د ښځو ټولنیز، اقتصادي او سیاسي پیاوړتیا، ننګونو او د پرمختګ لارو» تر سرلیک لاندې جوړه شوه.
د اسلامي همکاریو سازمان د ښځو چارو وزیرانو نهمه غونډه، د دې سازمان د ۷۵ غړو هېوادونو د استازو په حضور کې د دوه ورځو لپاره جوړه شوې وه.
د دې غوندې ګډونوالو په ۳۲ مادییز پرېکړه لیک او خپله اعلامیه کې ویلي، د نجونو په زده کړه او د ښځو په کاري فرصتونو، د طالبانو د محدودیتونو له امله ناهیلي او خواشیني دي.
د اسلامي همکاریو سازمان د ښځو چارو وزیرانو زیاته کړې، په افغانستان کې د ښځو په زده کړه او کار د طالبانو محدودیتونه «د اسلام ماهیت او انځور ته زیان رسوي.»
هغوی د اندېښنې په څرګندولو سره ویلي: «په افغانستان کې د نجونو په زده کړه او د ښځو په کار د محدودیتونو دوام، د کرامت، حقونو د خوندیتوب او د ښځو او نجونو د حیثیت لوړولو له اسلامي ارزښتونو سره په ټکر کې دی.»
دوی د زده کړې او کار په وړاندې د خنډولو لرې کولو او د اسلامي ارزښتونو سره سم، د افغانستان په عامه ژوند کې د ټولو ښځو او نجونو د بشپړ، برابر او اغېزمن ګډون پر اړتیا» ټینګار کړی دی.
د یادې غوندې ګډنوالو د دې سازمان له غړو هېوادونو وغوښتل، چې د نجونو او ښځو لپاره د حرفوي زده کړو او د رهبرۍ مهارتونو د پراختیايي پروګرامو، فرصتونو ته پراختیا ورکړي.
سره له دې، چې افغانستان د اسلامي همکاریو سازمان غړی دی، خو د دې سازمان نهمه غونډه، د افغانستان له استازي پرته په پاکستان کې پای ته ورسېده.
له دې مخکې یو شمېر رسنیو لیکلي وو، د اسلامي همکاریو سازمان له طالبانو غوښتي وو، چې د افغانستان په استازیتوب یوه ښځه دې غونډې ته ورولېږي، خو دې ډلې دغې غوښتنې ته ځواب نه دی ورکړی.
د طالبانو د بیا واکمنېدو په پنځه کله موده او په هېواد کې د ښځو په وړاندې د دې ډلې له خوا د پراخو محدودیتونو لګولو په ترڅ کې، د اسلامي همکاریو سازمان په پرلپسې ډول د ښځو په وړاندې د دې ډلې پر محدودیتونو نیوکه او د لغوه کېدو غوښتنه یې کړې ده.
خو دې ډلې د اسلامي همکاریو سازمان غوښتونو ته په نه پاملرنې، په هېواد کې د ښځو په وړاندې خپل محدودیتونه پای ته نه دي رسولي.
