د اروپايي ټولنې غړې هانا نیومن د افغان کډوالو د ایستلو په تړاو د بروکسل غونډې کې د طالب پلاوي بلنې ته په غبرګون کې وايي، دا غونډه «له هېڅ ډول حساب ورکولو پرته د طالبانو سیاسي عادي کول دي.»
رخشانه: هغې پرون سه شنبې د (چنګاښ ۲۳ مه) په خپله اېکس پاڼه لیکلي، لا هم د دې غونډې په اړه پوښتنې شتون لري او له طالبانو سره دا غونډه باید هېڅ کله نه وای تر سره شوې.
نیومن زیاته کړې، اروپايي کمېسیون ټنګار لري، چې دا غونډه یوازې د هغو کډوالو د ایستلو په تړاو وه، چې په جرمونو لکه، ترهګرۍ، وژنو او جنسي تېري محکوم شوي دي.
د اروپايي ټولنې دې غړې ویلي «د راپورونو له مخې، آلمان د هغو افغان کډوالو ایستلو لپاره چمتوالي نیسي، چې هېڅ جرمي سزا نه لري.»
په طالبانو دا نیوکه کوونکې افغانسان ته د کډوالو ایستلو لپاره د قونسلګرۍ خدمتونو د اړتیا په اړه د طالبانو د خبرو په حواله پوښتلي، آیا اروپايي کمېسیون په ټوله اروپا کې د افغان قونسلګرۍ د خدمتونو د لېږد لپاره طالب چارواکو ته لار هواره کړې ده؟
مېرمن نیومن ټینګار کړی: «دا ډول اقدام د بېرته ستنولو پروسې اسانه کولو څخه ډېر لرې وي.» نیومن ویلي «د هغو افغانانو لپاره چې له طالبانو تښتېدلي دي، یوه لنډماله یا خالصه دیپلوماتیکه مسله نه ده.»
نیومن د بروکسل غونډې جوړېدو او د دې ناستې د شکونو په اړه ویلي، «له طالبانو سره یوازې مسلکي تعامل شتون نه لري. دا له هېڅ ډول حساب ورکولو پرته د طالبانو سیاسي عادي کول دي.»
هغې له اروپايي ټولنې غوښتي، دا روښانه کړي، چې کوم افغان کډوال ایستل کېږي، په اروپا کې مېشت افغانان به څنګه د پولې له خوا له جبر څخه خوندي وي او طالبان یې په بدل کې څه غواړي.
