د افغانستان د بشري حقونو فعالانو د ۱۰۰ زره لاسلیکونو په راټولولو سره له اروپايي ټولنې «د ترهګرې ډلې په توګه د طالبانو او افغانستان کې د جنستي توپیر په رسمیت پېژندلو» غوښتنه کړې ده.
رخشانه: د بشري حقونو فعال او د افغانستان د پارلمان پخواني غړي بکتاش سیاوش نن (پنشنبې د چنګاښ ۲۵ مه) په خپله اېکس پاڼه د یوه پوسټ په خپرولو سره لیکلي، دې کمپاین کې د راټولو شویو لاسلیکونو شمېر له ۱۰۰ زره څخه اوښتی دی.
هغه له دې کمپاین په لار اچولو هرکلي سره، هغه «په افغانستان کې د تر ټولو بنسټیزو بشري حقونو څخه ملاتړ» بللی دی.
بکتاش لیکلي دي: «درې میاشتې وړاندې دا عریضه په رسمي ډول د اروپا پارلمان ته د عریضې د ثبت پروسې له لارې وسپارل شوه.»
د هغه په وینا، له دې کمپاینه نړیوال ملاتړ «د طالبانو تر واکمنۍ لاندې د افغان ښځو او نجونو د سیستماتیکي ځپنې په وړاندې د عملي او مسوولانه اقدام لپاره مخ په زیاتېدونکې غوښتنې په ګوته کوي.»
د بشري حقونو دې فعال په افغانستان کې د ښځو او نجونو په وړاندې د طالبانو محدودیتونو ته اشاره کړې وايي، دا محدودیتونه «د جنستي توپیر یو سیستماتیک نظام دی، چې په نړیواله کچه حقوقي او سیاسي رسمیت پېژندنې ته اړتیا لري.»
د نړۍ له ګوټ ګوټ نه څه د پاسه سل زره کسانو په دې بلنه کې ګډون کړی او له اروپايي بنسټونو یې غوښتي، چې د بشري حقونو، عدالت او انساني کرامت له اصولو دفاع وکړي.
دوی له اروپايي ټولنې او ارپايي پارلمان نه غوښتي، چې په افغانستان کې جنستي توپیر په رسمیت وپېژني او له طالبانو سره د اړیکې له عادي کولو ډډه وکړي.
همدارنګه د بشري حقونو فعالانو له نړیوالې ټولنې غوښتي، چې طالبان په رسمي توګه د یوه ترهګر سازمان په توګه وپېژني.
هغوی له افغان ښځو او نجونو د نړیوالې ټولنې د ملاتړ غوښتنه کړې وايي، نړیواله ټولنه او د بشري حقونو نور بنسټونه باید، د میلیونه افغان ښځو او نجونو د سیستماتیکې ځپنې په وړاندې جوپه خوله نه شي.
