افغانستان کې د ملګرو ملتونو د سیاسي استازولۍ (یوناما) دفتر اعلان کړی، چې بنګله دېشۍ مېرمن رباب فاطمه، د افغانستان لپاره د ملګرو ملتونو د سرمنشي ځانګړې استازې ټاکل شوې ده.
رخشانه: یوناما نن (پنشنبې د چنګاښ ۲۵ مه) په خپله فسبوک پاڼه د یوه پوسټ په خپرولو سره د خپل ځانګړي استازې په توګه د رباب فاطمه د ټاکل کېدو خبر ورکړی دی.
افغانستان کې د ملګرو ملتونو د ځانګړۍ استازولۍ دفتر لیکلي، رباب فاطمه د قرغیستاني دیپلوماتې روزا اوتونبایوا، چې ماموریت یې د ۲۰۲۵ په سپټمبر کې پای ته رسېدلی، ځای ناستې شوې ده.
د یوناما د مشرې په توګه د مېرمن اوتنبایوا د ماموریت پای ته رسېدو وروسته، د یوناما سیاسي مرستیال جورجټ ګانیون، په افغانستان کې د ملګرو ملتونو د سیاسي استازولۍ دفتر سرپرستي په غاړه درلوده.
افغانستان کې د ملګرو ملتونو د سیاسي استازولۍ دفتر لیکلي، مېرمن فاطمه، په ملي او نړیواله کچه، په ملکي برخه کې د ملکي خدماتو برخو کې ۳۰ کلنه تجربه لري.
رباب فاطمه په نړیوالو اړیکو او د امریکا په ټافټس پوهنتون کې د ديپلوماسۍ په برخه کې ماسټري او د استرالیا له کانبیرا پوهنتون څخه د ټولنیزو چارو لیسانس لري.
رباب فاطمه په داسې حال کې، په افغانستان کې د ملګرو ملتونو د سیاسي استازولۍ د دفتر مشره ټاکل شوې، چې تازه په افغانستان کې د یوناما ماموریت د یوه بل کال لپاره نوی شوی دی.
