ننګرهار کې ځايي سرچینې وايي، د دې ولایت د مرکز جلال آباد ښار په یوه هوټل کې، په یوې ځوانې نجلۍ ډلیز جنسي تېری شوی دی.
رخشانه: جلال آباد ښار کې دوه ځايي سرچینو د هویت پټ ساتلو سره رخشانې رسنۍ ته و ویل، دا پېښه د پنشنبې په ورځ (د چنګاښ ۲۴ مه) د اولې امنیتي حوزې اړوند سیمه، «کابل» هوټل کې رامنځ ته شوې ده.
د سرچینو په وینا، دا ځوانه نجلۍ شاوخوا ۲۱ کلنه او د لغمان ولایت د عليشنګ ولسوالۍ اصلي اوسېدونکې ده.
دا ځوانه نجلۍ له یوه سړي او یوه خپلوان کس سره، چې ناروغ دی، د پایواز په توګه د ننګرهار مرکز جلال آباد ښار کې حوزوي روغتون ته راغلې ده.
نوموړې له همغه سړي سره یو ځای د شپې تېرولو لپاره د جلال آباد ښار د اولې امنیتي حوزې اړوند «کابل» هوټل ته تللې وه.
د سرچینو په وینا، د هوټل څښتن دې نجلۍ او سړي ته د ارام کولو لپاره جلا جلا کوټې په پام کې نیسي او هغوی هم یو له بله بېلوي. له دې نجلۍ سره سړی د شپې په هوټل کې نه پاتې کېږي او ناروغ کس ته روغتون ته ورځي.
سرچینو زیاته کړې، د شپې په جریان کې د هوټل څېښتن له څو تنو نورو ملګرو سره یو ځای، د دې نجلۍ کوټې ته ورننوتي او پر هغې یې ډلیز جنسي تېری کړی دی.
د رخشانې رسنۍ سرچینو زیاته کړې، په سبا سهار، دا ځوانه نجلۍ او ورسره سړی، جلال آباد ښار کې د طالبانو لومړنۍ امنیتي حوزې ته ورغلي او موضوع یې له هغوی سره شریکه کړې ده.
جلال آباد کې د طالبانو له منځه یوې سرچینې د هویت پټ ساتلو سره ویلي، د «کابل» هوټل د څېښتن په ګډون پنځه تنه د دې پېښې په تړاو نیول شوي دي.
جلال آباد ښار کې ځايي طالبانو ویلي، د پېښې د روښانه کولو لپاره پلټنې پیل شوې دي.
تر اوسه ننګرهار کې ځايي طالب چارواکو د دې پېښې په اړه په رسمي توګه څه نه دي ویلي. رخشانه رسنۍ ونه توانېده، چې له دې نجلۍ یا د هغې د کورنۍ له غړو او یا هم د هوټل له څېښتن سره خبرې وکړي.
