په ملګرو ملتونو کې د افغانستان د دایمي استازولۍ سرپرست نصیر احمد فایق ویلي، افغانستان په ځانګړې توګه هرات کې یو شمېر ښځې او نجونې د «بې حجابۍ» په پلمه د طالبانو له خوا د نیولو پر مهال له فزیکي تاوتریخوالي او جنسي ځورونې سره مخ شوې دي.
رخشانه: ښاغلي فایق نن سهار (یکشنبې د چنګاښ ۲۸ مه) په خپله اېکس پاڼه د یوه پوسټ په کولو سره دا ادعا کړې او د «طالبانو له خوا د ځواک نه وړه ګټې» اخیستنې په اړه یې اندېښنه ښودلې ده.
هغه لیکلي دي: «د طالبانو د استخباراتي او امربالمعروف غړو له خوا د افغانستان په بېلا بېلو ولایتونو، په ځانګړې توګه په هرات ولایت کې له ځواک او واکونو ناوړه ګټې اخیستنې په اړه مستند او ټکان ورکوونکی راپورونه خپاره شوي، چې د اندېښنې او ژورې خواشینۍ وړ دي.»
د افغانستان د دایمي استازولۍ سرپرست وايي، خپاره شوي راپورونه څرګندوي، چې له دې په ځینو ښځو، نجونو او د هغوی په کورنیو فشار راوړل شوي، چې اجباري واده ته غاړه کېږدي.
هغه پوښتنه کړې: «آیا د طالبانو رهبري چې د امنیت د خوندیتوب او عدالت ادعا کوي، د خپلو ځواکونو له دې اقداماتو او چلند څخه خبر نه دي، یا دا ډول اعمال د هغوی په هدایت او خوښه تر سره کېږي؟»
فایق د «طالبانو پورې تړلو کسانو لپاره له سزا د خوندیتوب او د عادي خلکو لپاره د سزا ټاکلو کلتور» د دوام په اړه خبرداری ورکړی وايي، دغه چلند نه یوازې د طالبانو په نظام کې د عدالت نشتوالی څرګندوي، بلکې پر دې ډله د خلکو بې باوري لا زیاتوي او په پای کې به د خلکو عمومي غوسه او ناخوښي پراخه کړي.
په ملګرو ملتونو کې د افغانستان د سیاسي استازولۍ سرپرست ویلي «هغه څه چې نن د طالبانو په عمل او چلند کې لیدل کېږي، له عدالت، قانون له حاکمیت او ارزښتونو سره، چې دوی یې خپله د پلي کېدو ادعا کوي، واټن لری.»
د طالبانو له خوا د معترضو او هغو ښځو په وړاندې، چې د بې حجابۍ په پلمه په یو شمېر ولایتونو کې نیول شوې او زنداني شوې دي، د تېري او جنسي ځورونې خبر کومه نوې پېښه نه ده.
رخشانې رسنۍ له دې وړاندې هم د طالبانو په زندانونو کې په بندي ښخو د دې ډلې له خوا د تېري او جنسي ځورونې راپورونه خپاره کړي وو.
د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ هم په یوه راپور کې ویلي وو، د طالبانو په زندانونو کې په یو شمېر ښځو او نجونو جنسي تېری شوی دی.
هغه د طالبانو تر واک لاندې افغانستان کې، د ۲۰۲۴ کال له جنورۍ تر اګست میاشتې پورې د بشري حقونو د وضعیت په راپور کې لیکلي وو، چې په یو شمېر ولایتونو کې یې د بې حجابۍ په تور په نیول شویو ښځو د طالبانو د جنسي تېري راپورونه مستند کړي دي.
بنټ ویلي وو، چې نیول شوې ښځې د پولیسو پوستو ته لېږدول شوې، وهل شوې، سپکاوی ورته شوی او په ځینو مواردو کې پرې جنسي تېری هم شوی دی.
