افغانستان کې د ملګرو ملتونو د بشري مرستو د همغږۍ دفتر (اوچا) ویلي، روان ۲۰۲۶ میلادي کال به په افغانستان کې ۴.۹ میلیونه میندې او ماشومان د تغذیې ملاتړ ته اړتیا ولري.
رخشانه: دې بنسټ نن (دوشنبې د چنګاښ ۲۹ مه) په خپله اېکس پاڼه، د طالبانو تر واک لاندې افغانستان کې د خوارځواکۍ د زیاتېدو په اړه خبرداری ورکړی دی.
اوچا ویلي دي «په افغانستان کې د میلیونونه میندو لپاره پاتې کېدل، د خوارځواکۍ له ګواښ سره سره د هیلې په مانا ده.»
د ملګرو ملتونو د بشري مرستو د همغږۍ دفتر افغانستان کې له اړمنو کسانو سره د مرستې غوښتنه کړې وايي «په وخت اقدام سره کولی شو د انسانانو ژوند وژغورو.»
د بشري حقونو څارډلې په دې وروستیو کې لیکلي، افغانستان کې میلیونونه کسان، د مخ په پراخېدونکې لوږې سره مخ دي.
د ملګرو ملتونو د راپورونو له مخې، افغانستان کې شاوخوا ۲۲ میلیونه کسان، بېړنیو خوراکي مرستو او د درملنې خدماتو ته اړتیا لري او روان میلادي کال له ۱۷ میلیونه زیات کسان د خوړو د شدید نه خوندیتوب سره مخ دي.
د بهرنیو مرستو شدید کمښت او پرلپسې وچکالۍ په افغانستان کې بشري وضعیت په چنده خراب کړی. په افغانستان کې نړیوال مرستندویه بنسټونه ناچاره شوي، چې خپل ملاتړي پروګرامونه راکم کړي، خدمات یې محدود کړي او مرستې یوازې اړمنو کسانو ته ځانګړې کړي.
په افغانستان کې فعالو نړیواله مرستندویه بنسټونو په وار وار، په دې هېواد کې د بشري کړکېچ د رامنځ ته کېدو په اړه خبرداری ورکړی دی. دې بنسټونو ویلي، که بېړنۍ بودجه برابره نه شي، په هېواد کې په میلیونونه کسان، حیاتي مرستو ته خپل لاسرسی له لاسه ورکړي.
