د «افغانستان د ښځو د فانوس آزادۍ غورځنګ» غړو ویلي، له پاکستان نه د افغان کډوالو د جبري ایستلو دوام به نه جبرانېدونکې پایلې ولري او دا لړۍ باید ژر تر ژره ودرول شي.
رخشانه: د دې اعتراضي غورځنګ غړو په یوه اعلامیه کې لیکلي، له پاکستان نه د افغان کډوالو ایستلو د زرګونو تنو ژوند له خطر سره مخ کړی دی.
د «افغانستان د ښځو د فانوس آزادۍ غورځنګ» په اعلامیه کې راغلي: «هغه څه چې نن په پاکستان کې پر افغان کډوالو تېرېږي، د نړۍ د وجدان آزموینه ده.»
معترضو ښځو لیکلي، افغان کډوال «له جګړې، ځپنې او ګواښلو څخه تښتېدلي، اوس له نیولو، وېرې او د جبري ایستلو له خطر سره مخ دي، داسې یو وضعیت چې د زرګونو تنو ژوند یې په خطر کې اچولی دی.»
هغوی د طالبانو تر واک لاندې افغانستان ته د کډوالو د ایستلو د دوام په اړه خبرداری ورکړی وايي «هېڅ پناه غوښتونکی انسان نه باید هغه ځمکې ته بېرته ولېږل شي، چې خپلواکي، امنیت او ان د ژوندي پاتې کېدو حق یې له خطر سره مخ دي.»
د «افغانستان د ښځو د فانوس آزادۍ غورځنګ» د پاکستان له دولت نه غوښتي، چې د کډوالو د نیولو او ستنولو لړۍ ودروي او د انساني کرامت په رعایت سره، د پناه غوښتونکو حقونه خوندي کړي.
همدارنګه دوی له ملګرو ملتونو غوښتي، چې «د کډوالو په تړاو خپل قانوني، انساني او اخلاقي مسوولیت» عملي کړي.
معترضې ښځې د «افغانستان ته د کډوالو د جبري ستنولو د مخنیوي لپاره د ملګرو ملتونو د بېړنیو او ګټورو اقداماتو» غوښتنه کړې ده.
د طالبانو او پاکستان تر منځ د جګړو تر زیاتېدو او جګړې د ښکېلو غاړو تر منځ د بې پایلې خبرو په ترڅ کې، د پاکستان دولت د افغان کډوالو د ایستلو لړۍ ته زور ورکړی دی.
د بشري حقونو بنسټونو او فعالانو تل له پاکستان نه د افغان کډوالو د نه ستنولو غوښتنه کړې ده. د فعالانو په وینا، له ګواښ سره مخ کسان نه باید افغانستان ته ستانه کړای شي، ځکه دا کسان ښايي د طالبانو له لوري ونیول شي.
