سمنګان کې د طالبانو امنیه قومانداني وايي، د دې ولایت په دره صوف پایین ولسوالۍ د دوو کلیو کې په اوسېدونکو یوه وحشي داړونکي ځناور حمله کړې او د ښځو او ماشومانو په ګډون یې ۱۹ تنه ټپیان کړي دي.
رخشانه: د طالبانو د امنیه قوماندانۍ په خبرپاڼه کې ویل شوي، دې وحشي داړونکي ځناور پرون (سه شنبې د چنګاښ ۳۰ مه) د «قره جنګل او اویتان شمالک» کلیو په اوسېدونکو حمله کړې ده.
د خبرپاڼې له مخې، د دې وحشي ځناور په برید کې د ښځو او ماشومانو په ګډون، د دې دوو کلیو ۱۹ تنه ټپیان شوي دي.
د دې پېښې ټپیان د درملنې په موخه روغتیايي مرکز ته لېږدول شوي او روغتیايي حالت یې د ډاډ وړ ښودل شوی دی.
معلومه نه ده، چې ټپیانو کې څومره شمېر ښځې او ماشومان دي.
د دې داړونکي حیوان ډول هم نه دی معلوم شوی. خو د جسد د انځور پر اساس، دا ځناور لېوه ته ورته دی.
د هیواد په کلیوالي سیمو کې پر ځايي اوسېدونکو د وحشي داړونکو ځناورو بریدونه کومه نادره پېښه نه ده، له دې وړاندې هم د هېواد په یو شمېر ولایتونو کې ورته پېښې رامنځ ته شوې، چې د یو شمېر کسانو د ټپي کېدو لامل شوې دي.
