افغانستان کې د ملګرو ملتونو د بشري مرستو د همغږۍ دفتر (اوچا) وايي، د افغانستان په ختیځ نورستان، ننګرهار او لغمان ولایتونو کې د دوشنبې ورځې په راوتلو سېلابونو کې ۲۶ تنو ژوند له لاسه ورکړی او ۲۴ نور ټپیان شوي دي.
رخشانه: دې بنسټ نن (چهارشنبې د چنګاښ ۳۱ مه) په خپله اېکس پاڼه د یوه راپور په خپرولو سره لیکلي، د دوشنبې د ورځې سېلابونو په دې درې ولایتونو کې پر انساني مرګ ژوبلې سربېره، ګڼ مالي زیانونه هم اړولي دي.
د اوچا په راپور کې راغلي، د نورستان مرکز پارون ښار کې د راغلو سېلابونو له امله، ۲۳ تنو ژوند له لاسه ورکړی، ۱۵ تنه ټپیان او یو شمېر لا هم ورک دي.
د دې بنسټ د راپور له مخې، د ورکو شویو کسانو د موندلو او ژغورلو عملیات لا هم دوام لري.
معلومه نه ده، چې له ورکو شویو کسانو څومره ښځې او ماشومان دي. د ټپیانو د روغتیايي حالت په اړه هم کوم راپور نشته.
اوچا ویلي، پارون ښار کې د سېلابونو راوتو، لږ تر لږه ۲۲ کورنه بشپړ نړولي، ۴۵ یې قسمي تخریب کړي، یو جومات او یو خصوصي کلېنیک له منځه تللي، پنځه مارکېټونه او شاوخوا ۷۰ دوکانونه زیانمن شوي دي.
دې بنسټ په خپل راپور کې راوړي، څلور پلونه، د اوبو لګولو ۴۵۰ متره کانال او نېږدې ۵۰ جرېبه کرنیزه ځمکه هم د نورستان د مرکز پارون په سېلابونو کې زیان لیدلی دی.
اوچا لیکلي، د ننګرهار په تورخم کې هم د سېلابونو راوتلو، درې تنه وژلي او نهه نور ټپیان شوي دي. دا کسان له پاکستان نه راستنېدونکي ګډوال وو.
همدارنګه د لغمان په علینګار ولسوالۍ کې د سېلابونو راوتو، لسګونه جرېبه کرنیزه ځمکه ویجاړه کړې او د اوبو لګولو سیستم یې زیانمن شوی دی. لغمان کې سېلابونو انساني تلفات نه درلودل.
د ملګرو ملتونو د بشري مرستو د همغږۍ دفتر ویلي، پارون ښار کې د اوبو رسولو د یوې شبکې د زیانمنېدو له امله، شاوخوا زر کورنۍ د څښاک اوبو ته له لاسرسي بې برخې شوې دي.
اوچا سېلاب ځپلو ته د رسیدګۍ غوښتنه کړې وايي، خلک بېړنیو مرستو لکه، بېړنۍ سرپنا، د خوړو مرسته، بېړني روغتیايي خدمات، درمل، غیرخوراکي توکي او رواني- ټولنیز ملاتړ ته اړتیا لري.
طالبانو پرون ماښام اعلان وکړ، چې د نورستان مرکز پارون کې د دوشنبې ورځې سېلابونو کې د یوې ښځې او یوه ماشوم په ګډون ۲۳ تنو ژوند له لاسه ورکړی، ۸۰ تنه ټپیان او شاوخوا ۱۰۰ کسان ورک دي.
نورستان کې د ځايي طالبانو د ادعا له مخې، دې سېلابونو لسګونه جرېبه کرنیزه ځمکه ویجاړه کړې او د سیمې اوسېدونکو ته یې شاوخوا ۳۵ میلیون ډالره زیان اړولی دی.
