د طالبانو د ارشاد، حج او اوقافو وزارت د واده او خوښۍ د مراسمو جوړولو لپاره نوې تګلارې ټاکلې او په ټول هېواد کې یې د جوماتونو له خطیبانو او ملا امامانو غوښتي، چې دا امر د جمعې د ورځې خطبه کې بیان کړي.
رخشانه: دا لارښوونې نن (پنشنبې د زمري اوله) د «ودونو او خوښۍ په مراسمو کې له منکراتو او شرعې خلاف رواجونو ډډه کولو» تر سرلیک لاندې، په پښتو او دري ژبو صادرې شوې دي.
د حج او اوقافو وزارت په لارښوونو کې راغلي «څوک چې تر خپلې سرپرستۍ لاندې د خپلې لور، مېرمنې او نورو ښځو لپاره غیرت نه لري او هغوی د ټولو په وړاندې ښکاره کوي، دووث دی.»
طالبانو ویلي، په هېواد کې د خوښۍ او غم په مراسمو کې له اسلامي لارښونو پیروي نه کېږي او په ټولنه کې ناوړه دودونه رواج شوي، چې دا «له شیطان څخه پیروي» ده.
دې وزارت زیاته کړې چې د ګوژدنې په مراسمو کې «نجلۍ او هلک ته ګوتمۍ ور په ګوته کول او یو د بل په لاسونو نکروزې اېښودل.» نا روا دي.
دا وزارت په خپل لارښود کې وايي «د مسلمان نارینه لپاره د سرو زور ګوتمۍ په ګوته کول حرام دي او که چېرې ګوتمۍ د سروزو هم نه وي، دا رواج د مسیحیانو دی.»
طالبانو ویلي، د واده یا ګوژنې په ورځ له کوره د باندې د سینګار لپاره د ښځو بېول «په ډېری مواردو کې د شرعې خلاف کار او فحشا کارونو تر سره کېدو زمینه جوړوي» او د ښځو لپاره سینګار، د طبیعي وېښتانو نښلول او ښکلا ته دوکه ورکول، ناروا دي «ځکه حقیقت پټېږي.»
دې ډلې په خپل لارښودي عمل کې ویلي، د ګوژدنې یا واده په مراسمو کې د ښځو له خوا د نرۍ او تنګو جامو اغوستل ناروا دي او هغه نارینه چې خپلو ښخو ته د دې ډول جامو د اغوستلو اجازه ورکوي «بې غیرته» دي.
په دې لارښود عمل کې راغلي، د ښځو لپاره روا نه دي، چې د کوژدنې یا د واده په مراسمو کې له کوره د باندې عطر ووهي. طالبانو د پیغمر یو حدیث راوړی، چې په هغه کې ویل شوي «که کومه ښځه ځان خوش بویه کړي او د یوه نارینه تر څنګ تېره شي، د زنکارې ښځې په شان ده.»
د طالبانو د حج او اوقافو وزارت لیکلي، په هوټلونو او تالارونو کې د کوژدنې او ودونو د مراسمو جوړول مفسداتو ته لار جوړوي، ځکه ښځې د نامحرمه کسانو په وړاندې جامې او حجاب نه مراعت کوي.
طالبانو د واده او کوژدنې په مراسمو کې د ښخو او نارینه وو له خوا سندرې ویل او نڅا هم ناوړه عمل بللی ویلي یې دي «د نڅا پر مهال د ښخې اندامونه او ښکلا نارینه وو ته ښکاري.» طالبانو د نارینه وو په وړاندې د ښځو سندرې ویل هم بد او ناوړه عمل بللی دی.
د طالبانو د حج او اوقافو وزارت ښځو ته لارښوونه کړې، چې «په خپل ایمان، عفت او عزت غیرت ولري او د لوېدیځ په کلتور دوکه نه شي.»
