د رخشانې رسنۍ د مسوولې زهرا جویا د کابل ورکه شوې نجلۍ «دختر ناپدید شدهی کابل» تر سرلیک لاندې کتاب، د روان کل د زمري په لومړۍ نېټه د پنشنبې په ورځ برېتانیا کې خپور شو.
رخشانه: د دې کتاب د مخکتنې مراسم، د لند ښار په پېژندل شوي «دانت بوکس Daunt Books» کتاب پلورنځي کې د ۱۲۰ تنو په ګډون تر سره شول.
دا کتاب د زهرا جویا د ژوند د خاطرو، رخشانې رسنۍ کې د هغې د څېړنیزې خبریالې د بېړني حالت او دقت او په افغانستان کې د څو لسیزو پېښو د تاریخي کیسو په ترکیب سره لیکل شوی دی.
د دې اثر لیکوالې زهرا جویا د خپل کتاب په مختکتنه کې و ویل: «د کابل ورکه شوې نجلۍ کتاب یوازې زما د ژوند کیسې نه دي. دا کتاب د افغان ښځو د پټ او نه هېرېدونکي تاریخ د ثبتولو یوه هڅه ده، د جګړې، کډوالۍ، تبعیض او هېرېدو په ترڅ کې، له لاسه ورکړل شویو غږونو هڅه ده، چې یو ځل بیا واورېدل شي.»
نوموړې زیاته کړې: «غوښتل مې دا کتاب، د شخصي ژوند د یادونو ژورتیا، د تحقیقي خبریالۍ د بېړنیتوب او کرتوب سره یو ځای کړم.»
مېرمن جویا وايي، دا کتاب د جنسیت پر بنسټ ولاړ ظلم ترخه واقعیتونه څرګندوي، هغه ظلم چې نه یوازې د طالبانو تر واک لاندې افغانستان، بلکې په ټوله نړۍ کې دوام لري.
دا کتاب د خبریالې او ژورنالېزم په ډګر کې د معتبرو جایزو ګټونکې امي فریس راتمن په همکارۍ لیکل شوی دی.
مېرمن راتمن په افغانستان کې د کار او راپور ورکولو څو کلنه تجربه لري او د رخشانې رسنۍ د باوري پلاوړي غړې هم ده.
دا کتاب یوې پېژندل شوې او نړیوالې خپرونې، رابینسون چاپ او خپور کړی دی.
دې خپرونې په خپله فسبوک پاڼه د یوه پوسټ په خپرولو سره لیکلي دي: «نن ورځ په ډېر ویاړ سره، «د کابل ورکه شوې نجلۍ کتاب» چې د زهرا جویا کتاب د امي فریس- راتمن په همکارۍ لیکل شوی دی، خپروم.»
رابینسون خپرونې لیکلي: «دا کتاب د زهرا جویا د ژوند یوه خارق العاده کیسه ده، د زړورتیا، مقاومت او له هر څه زیات د امید کیسه. دا ډېرې ځواکمنۍ او ژورې اغېزناکې خاطرې، سر له نن نه په ټولو متعبرو کتاب پلورنځیو کې د تر لاسه کولو وړ دي.»
د نوبل جایزې تر ټولو ځوانې ګټوونکې ملالې یوسفزی په یوه لنډ یاداښت کې، دا کتاب ستایلی دی.
هغې لیکلي: «هغه خاطرې چې هممهاله جدي خبرداری هم دی. زهرا جویا د هغو ښځو لپاره لیکي، چې نړۍ هغوی د طالبانو بې رحمه جنسیتي توپیر ته سپارلې او اجازه نه ورکوي، چې د هغوی یادونه وکړو… هغه زموږ د ژوند یوه تر ټولو زړوره خبریاله ده.»
تلګراف ورځپاڼې هم د دې کتاب په اړه په یوه مطلب کې لیکلي دي: «دا یو مهم کتاب دی او زهرا جویا یو مهم غږ دی. د هغې نثر په شاعرانه نازک خیالۍ سره، هغه کیسې ته چې په خپل ځان کې وېرونکې ده، ښکلا وربښي.»
ټاکل شوې دا کتاب د اکتوبر په شپږمه په امریکا او نورو انګلیسي ژبو هېوادونو کې هم خپور شي.
د «کابل ورکه شوې نجلۍ کتاب» په ۲۸۳ مخونو کې چاپ شوی او ټاکل شوې په څو نورو ژبو، له هغې جملې په ایټالوي ژبه هم ژباړه او چاپ شي.
