افغانستان کې د ملګرو ملتونو د بشري مرستو د همغږۍ دفتر (اوچا) وايي، د مرستو کمښت او د تمویل تشه ۲۰۲۶ کال په افغانستان کې د ۵.۷ میلیونه ماشومانو او میندو د تغذیې پروګرامونه ګواښي.
رخشانه: دې بنسټ نن (یکشنبې د زمري ۴ مه) په خپله اېکس پاڼه لیکلي دي، له بېړنۍ بودیجې پرته به افغانستان کې میلیونونه کسان، ژغورونکې پاملرنې له لاسه ورکړي.
د ملګرو ملتونو د بشري مرستو د همغږۍ دفتر، په افغانستان کې د بشري مرستو پروژو څخه د ملاتړ غوښتنه کړې ده.
اوچا لیکلي، هر ماشوم د دې وړ دی، چې روغ او پیاوړی شي.
دې بنسټ څه موده وړاندې هم اعلان کړی وو، چې په ۲۰۲۶ کال کې به، افغانستان کې ۴.۹ میلیونه میندې او ماشومان د تغذیې ملاتړ ته اړتیا ولري.
دې بنسټ د طالبانو تر واک لاندې افغانستان کې د سختې ځوارځواکۍ په اړه خبرداری ورکړ او یې لیکل «په افغانستان کې د میلیونونو میندو لپاره پاتې کېدل د خوارځواکۍ له ګواښ سره سره د هیلې درلودو په مانا دي.»
د ملګرو ملتونو د راپور له مخې، افغانستان کې شاوخوا ۲۲ میلیونه وګړي بېړنیو خوراکي مرستو او د درملنې خدماتو ته اړتیا لري او روان میلادي کال به له ۱۷ میلیونه زیات وګړي د خوړو له شدیدې ناامنۍ سره مخ شي.
د بهرنیو مرستو شدید کمښت او پرلپسې وچکالۍ، په افغانستان کې بشري وضعیت څو برابره خراب کړی دی.
په افغانستان کې نړیوال مرسته کوونکي بنسټونه اړ شوي، چې خپل ملاتړي پروګرامونه راکم کړي، خدمات محدود کړي او مرستې یوازې تر اړمنو کسانو پورې ځانګړې کړي.
