ننګرهار کې ځايي طالب چارواکي وايي، د دې ولایت مرکز جلال آباد ښار کې، د یوې پخوانۍ مرمۍ د چاودنې له امله یو ماشوم هلک وژل شوی او یو بل ټپي شوی دی.
رخشانه: ننګرهار کې د طالبانو د امنیه قوماندانۍ ویاند سید طیب حماد ویلي، دا پېښه پرون سه شنبې (د زمري ۶ مه) د جلال آباد ښار د نهمې ناحیې اړوند «سرخ دېوال» سیمه کې رامنځ ته شوې ده.
حماد وايي، دې پخوانۍ مرمۍ هغه مهال چاودنه کې، چې دا دوه ماشومان د خپلو څارویو د څرولو په حال کې وو.
د حماد په وینا، د دې مرمۍ د چاودنې په ترڅ کې، یو ۱۱ کلن هلک ژوند له لاسه ورکړی او یو بل ۹ کلن هلک ټپي شوی دی.
ټپي شوی ماشوم د درملنې لپاره روغتون ته لېږدول شوی او روغتیايي حالت یې د ډاډ وړ ښودل شوی دی.
طالبانو له خلک غوښتي، چې ناچاودو توکو ته د خپلو ماشومانو له نېږدې کېدو مخنیوی وکړي.
ننګرهار د افغانستان ختیځ کې یو له هغو ولایتونو دی، چې تل په کې ورته پېښې رامنځ ته کېږي. هر کال په دې ولایت کې لسګونه ماشومان د ماینونو او ناچاودو توکو قرباني کېږي.
افغانستان د پخوانۍ او له طالبانو سره د جګړو له امله په ماینونو او ناچاودو توګو یو له تر ټولو لړلی هېواد دی. سره له دې، چې د ماین پاکولو بنسټونو کلونه فعالیت کړی، خو لا هم د دې هېواد ځینې برخې په ماینونو او ناچاودو توکو لړلې دي.
