هرات ښار کې ځايي سرچینې وايي، د طالبانو د امربالمعروف ځواکونو، د «بې حجابۍ» په تور د ښځو او نجونو د نیولو لړۍ بیا پیل کړې او د دې ولایت مرکز ښار کې یې دوه سړي او یوه ښځه ونیول.
رخشانه: هرات ښار کې دریو ځايي سرچینو رخشانې رسنۍ ته ویلي، یو سړی پرون سهار (چهارشنبې د زمري ۸ مه) د طالبانو د امربالمعروف ځواکونو د خپلې خور د نیولو په غبرګون کې د مقاومت له امله، د «چوک ګل ها» کې له «الماس شرق» مارکېټ څخه نیولی دی.
د یوې سرچینې په وینا، د طالبانو د امربالمعروف څلور ښځینه مامورانې او شپږ نارینه الماس شرق مارکېټ ته د ښځو د حجاب ارزولو په موخه راغلي وو.
سرچینې زیاته کړې، د طالبانو د امربالمعروف ځواکونو د هغې ښځې د نیولو قصد درلود، چې له خپل مېړه سره دې مارکېټ ته راغلې وه او له مارکېټ نه د وتلو پر مهال یې «چادرنماز» په سر نه درلود.
د سرچینې په وینا، د دې ښځې خاوند وروسته هغې چې د طالبانو د امربالمعروف ځواکونو له خوا د خپلې ښځې د نیول کېدو سره مخالفت وکړ، په پیل کې د هغوی له خوا وډبول شو او وروسته یې ونیوه.
یوه بلې سرچینې چې خپله یې دا صحنه لیدلې ویلي دي: «د دې ښخې مېړه ویل، مړ به مې کړی خو د خپلې ښځې د نیولو اجازه نه درکوم. هغه د امربالمعروف په محتسبانو برید وکړ او ښځې یې له ګڼې ګوڼې په ګټې اخیستنې تېښته وکړه.»
د سرچینې په وینا، دا سړی د طالبانو د امربالمعروف سره له لږ مقاومت وروسته، د هغوی له خوا ونیول شو.
سرچینې زیاته کړه، د طالبانو د امربالمعروف ځواکونو د هرات ښار له « ۲۴ متره سړک» یوه جوړه د «ښځو مانتو اغوستلو» په تور ونیول.
د تېرو دوه ورځو په اوږدو کې د هرات ښار له «۲۴ متره سړک» څخه یو شمېر نورې ښځې هم د طالبانو د امربالمعروف ځواکونو له خوا نیول شوې دي.
د طالبانو د امربالمعروف ځواکونو له خوا د «بې حجابۍ» په تور د ښځو او نجونو نیولو، د هرات ښارینو تر منځ وېره او اندېښنې پراخې کړې دي.
یو شمېر ښځې چې په دې موده کې نیول شوې، د ټولنیزو اندېښنو له پایلو او خپل عزت ساتلو له امله، له رسنیو سره خبرو اترو ته چمتو نه شوې.
