د «افغان ښځو د سیاسي ګډون شبکې» د اګست ۱۵ مه د جمهوري نظام د نسکورېدو په درشل کې ویلي، د طالبانو پنځه کلنه واکمني د ښځو ځپنې او له بشري حقونو سرغړونو سره مل ده.
رخشانه: د دې اعتراضي غورځنګ غړو نن (شنبې د زمري ۱۰ مه) په یوه بیانیه کې لیکلي، د طالبانو پنځه کلنه واکمني، د ازادیو له منځه وړلو، هدفي ځپنو، د بشري حقونو له پراخ سرغړاوي، د ښځو له لومړنیو انساني حقونو محرومیت، د بېوزلۍ، تبعیض او ناهیلۍ له پراخېدو سره مل شوې.
د «افغان ښځو د سیاسي ګډون شبکې» په بیانیه کې راغلي، طالبانو په دې پنځو کلونو کې په ځپنې، وېرې خپرولو او آزادۍ غوښتونکو غږونو په غلي کولو سره هڅه کړې، چې د افغانستان د خلکو ارادې ماتې کړي.
د دې اعتراضي غورځنګ د غړو په وینا، طالبانو په دې پنځو کلونو کې، ښځې له عمومي ځایونو حذف کړې، مدني فعالان او خبریالان یې تر فشار لاندې راوستي، له مذهبي او قومي لږکیو سره یې تبعیضي او له تاوتریخوالي ډک چلند کړی او د مخالفت هر ډول غږ ته یې په نیونې، ربړونې او ځپلو سره ځواب ورکړی دی.
معترضو ښځو د طالبانو او د دوی د مخالفو وسله والو ډلو نښتو ته په اشارې ویلي، د هېواد وګړي له کلونو محرومیت او فشار له زغملو سره سره، لا هم د آزادۍ، عدالت، انساني کرامت او د هېواد په راتلونکې کې د خپل ګډون غوښتونکي دي.
د «افغان ښځو د سیاسي ګډون شبکې» زیاته کړې، چې د افغانستان راتلونکې باید د بشري حقونو د روښانه اصولو، د ښځو او نارینه وو په بشپړې برابرۍ، برابر ګډون، قومي، مذهبي او ژبنۍ تنوع، د قانون حاکمیت او ولسوالۍ پر بنسټ جوړه شي.
د دې اعتراضي غورځنګ غړو له نړیوالې ټولنې، ملګرو ملتونو او د بشري حقونو له مدافع بنسټونو غوښتي، چې د افغانستان د خلکو د کړاو په وړاندې سکوت ونه کړي، د طالبانو ځپوونکې پالیسۍ عادي نه کړي او آزدۍ، عدالت او ځواب ویونکي حکومت د تر لاسه کولو لپاره د افغانستان د خلکو له مشروع غوښتنو ملاتړ وکړي.
