د «حجاب نه مراعت کولو» په تور د ښځو د نیولو په دوام، هرات ښار کې ځايي سرچینې وايي، په تېرو دوه ورځو کې د هرات ښار مرکز څخه دوه ځوانې نجونې او دوه سړي، د طالبانو د امربالمعروف ځواکونو له خوا نیول شوي او نامعلوم ځای ته یې وړي دي.
رخشانه: هرات ښار کې دوه ځايي سرچینو رخشانې رسنۍ ته ویلي، د طالبانو د امربالمعروف ځریو دوه نارینه د پنشنپې په ورځ (د زمري ۸ مه) د «باغ مراد» له سیمې او دوه ځوانې نجونې، پرون جمعه د (زمري ۹ مه) د «جاده مهتاب» له سیمې نیولې دي.
یو له سرچینو ویلي، د طالبانو امربالمعروف ځواکونو د پنشنبې ورځې په مازیګر (د زمري ۸ مه) د «باغ آزادي» له سیمې د یوې ۱۳ کلنې نجلۍ د نیولو قصد درلود، خو د هټۍ وال یې د نیولو خنډ شول.
د سرچینې په وینا، دا ماشومه نجلۍ او دوه نورې ښځې له پلې لارې د تېرېدو په حال کې وې او «چادرنماز یې له سره په اوږو پروتی وو» چې د طالبانو امربالمعروف ځواکونو موټر ورته ودراوه او د دې نجلۍ د نیولو قصد یې درلود.
سرچینې زیاته کړې، چې د هټۍ والو په منځګړیتوب، طالبانو دغه نجلۍ ونه نیوله، خو هغې له رواني پلوه زیان ولید او تل ژاړي.
بلې سرچینې ویلي، د طالبانو د امربالمعروف ځواکونو د پنشنبې ورځې په مازیګر، د هرات ښار د مرکز «باغ مراد» کوڅې څخه دوه نارینه د کلیزې لمانځلو مراسمو کې د موسقۍ د غږ لوړېدو په تور ونیول.
د سرچینې په وینا، د طالبانو څلورو تنو مامورینو هڅه کوله، چې دغه کور ته د ننه شي، خو د کورنۍ د نارینه وو د مخالفت سره مخ شول.
طالبانو د نورو ټولو ښارونو په پرتله په هرات ښار کې د ښځو او نجونو په جامو، تګ راتګ او عمومي ځایونو کې به شتون ډېر محدودیتونه لګولي دي.
دغه ډله ښځې او نجونې د چادر نماز نه په سر کولو یا د ماسک نه درلودو په تور نیسي او نامعلوم ځای ته یې لېږدوي. هرات ښار کې د حجاب نه مراعت کولو په تور، د ښځو او نجونو نیولو لړۍ دویمې میاشتې ته د ننه شوې ده.
هرات ښاریاونو د طالبانو د امربالمعروف ځواکونو له خوا د حجاب نه مراعت کولو په تور، د ښځو او نجونو په خپل سره نیونو او محدودیتونو اندېښنه څرګنده کړې ده.
