هېواد کې واک ته د طالبانو د بیا رسېدو د پنځمې کلیزې په درشل کې، د «ښځو د آزادۍ شبکې» غړو د ښځو وضعیت ته د نړیوالې ټولنې د پاملرنې او د طالبانو تر واک لاندې افغانستان کې د جنسیتي توپیر د پای ته رسولو غوښتنه وکړه.
رخشانه: د دې اعتراضي غورځنګ غړو نن (دوشنبې د زمري ۱۲ مه) د یوې اعتراضي غونډې پر مهال، یو ځل بیا د تبعیض لرونکو سیاستونو او جنسیتي توپير په وړاندې د افغان ښځو غږ پورته کړ.
د «ښځو د آزادۍ شبکې» په دې اعتراضي غونده کې د «آزادۍ»، «زده کړې»، «کار»، «برابرۍ» او «انساني کرامت» شعارونه ورکړل، او اساسي حقونو ته یې د ښځو د لاسرسي غوښتنه وکړ.
معترضو ښځو و ویل، د طالبانو تر واک لاندې افغانستان کې، له تېرو نېږدې پنځو کلونو راهیسې ښځې او نجونې په سیستماتیک ډول خپلو اساسي حقونو ته له لاسرسي محرومې شوې دي.
د هغوی په وینا، افغان ښځې او نجونې د ټولو فشارونو، ګواښونو او محدودیتونو سره سره، لا هم په تېرو پنځو کلونو کې د خپل آزاد، برابر او کرامت لرونکي ژوند په حق ټينګار کړی دی.
د «ښځو د آزادۍ شبکې» له ملګرو ملتونو، دولتونو، نړیوالو بنسټونو او د بشري حقونو له ټولو فعالانو وغوښتل، چې په افغانستان کې د جنسیتي توپیر په وړاندې چوپتیا غوره نه کړي.
همدارنګه د دې اعتراضي غورځنګ غړو له ملګرو ملتونو، دولت او د بشري حقونو له بنسټونو غوښتي، چې افغانستان کې د بشري حقونو ماتونې پای ته رسېدو لپاره عملي او ګټور ګامونه پورته کړي.
د بشري حقونو د څار سازمان هم نن په یوه اعلامیه کې لیکلي، چې د طالبانو په واکمنۍ کې په تېرو پنځو کلونو کې له بشري حقونو سرغړونې لا ژورې شوې او دولتونه باید د ځواب وینې او عدالت د پلي کېدو لپاره له هڅو ملاتړ وکړي.
دې سازمان لیکلي، طالبانو په افغانستان له ولکې وروسته، په نړۍ کې د بشري حقونو یو له تر ټولو خراب بحران په دغه هېواد کې بنسټیز کړی او د ښځو او نجونو حقونه یې په سیستماتیک ډول له منځه وړي دي.
