نورستان کې ځايي طالب چارواکي وايي، د دې ولایت برګ مټال ولسوالۍ کې د تېرې ورځې سېلاب درې ماشومان وړي، چې لا هم ورک دي.
رخشانه: نورستان کې د طالبانو د والي ویاند فریدون صمیم ویلي، د پرون ورځې (دوشنبې د زمري ۱۲ مې) له ماسپښین وروسته سېلاب برګ مټال ولسوالۍ کې ۸۷ کورونه په بشپړ ډول ویجاړ کړي دي.
د هغه په وینا د سېلاب راوتلو په ترڅ ک د لسګونو کورنو د ویجاړېدو سربېره، څو بوده څاروي هم تلف شوي او لسګونه جرېبه کرنیزه ځمکه هم تخریب شوې ده.
د روانې اوونۍ د یک شنبې (زمري ۱۱ مه) هم د دې ولایت په منډول ولسوالۍ کې سېلابونه روتلي وو. په دې ولسوالۍ کې د سېلاب راوتلو له امله، شپږ کورونه، لسګونه جرېبه ځمکه، کرنیز محصولات، سړکونه، کانالونه، بندونه او شپږ ژرندې هم ویجاړې شوې دي.
دغه راز د نورستان مرکز پارون ښار هم د روان کال د چنګاښ میاشتې په وروستیو کې د مرګونو سېلابونو شاهد وو.
د نورستان مرکز پارون ښار کې د دوشنبې (چنګاښ د ۲۹ مې) سېلابونو کې، ۲۴ تنو ژوند بایللی، ۲۴ نور ټپیان او څو تنه نور ورک شول.
له دې طبیعي پېښې د دوه اوونیو په تېرېدو، لا هم د پلټنې او ورکو کسانو د موندلو عملیات دوام لري. تېره ورځ د دوه تنو جسدونه د خټو او چیکړو څخه پیدا شول.
