افغانستان کې د ملګرو ملتونو د بشري مرستو د همغږۍ دفتر (اوچا) وايي، د طالبانو تر واک لاندې افغانستان کې، ډېری بشر دوستانه خدمات، د بودیجې د کمښت له امله لا هم درېدلي پاتې دي.
رخشانه: دې بنسټ نن (چهارشنبې د زمري ۱۴ مه) په خپله اېکس پاڼه د یوې اعلامیې په خپرولو سره، په افغانستان کې د بشردوستانه خدماتو وړاندې کولو د دوام لپاره، د بودیجې د برابرولو غوښتنه کړې ده.
اوچا په خپله اعلامیه کې ویلي، تر اوسه پورې یوازې ۲۶ سلنه د اړتیا وړ «د افغانستان د اړتیاوو پلان او بشردوستانه ځواب» بودیجه د ۲۰۲۶ کال لپاره تامین شوې ده.
دې بنسټ لیکلي دي «د معیشیت د ملاتړ، د ښځو د پیاوړتیا، د خوړو خوندبیتوب، د اقلیمي بدلون په وړاندې د مقاومت، ښوونې او روزنې او د ټولنې د بیارغونې په برخو کې، د بشري منابعو د شدید کمښت له امله، ډېری مهم خدمات په ټپه درېدلي دي.»
د ملګرو ملتونو د بشري مرستو د همغږۍ دفتر وايي، د بودیجې نشتوالي د زېزون روغتیايي خدماتو چمتو کولو د دوام لپاره د ادارې وړتیا باندې د پام وړ اغېزه کړې ده.
دې بنسټ د بودیجې د کموالي په اړه خبرداری ورکړی او لیکلي یې دي، د سرچینو کمښت د اړتیا وړ درملو، طبي توکو او د پوهاوي د کچې لوړولو فعالیتونو او ګرځنده خدماتو ته لاسرسی محدود کړی او په لرو پرتو او لږ برخمنو سیمو کې یې ښځو او نجونو ته د خدماتو رسول ستونزمن کړي دي.
د اوچا په وینا، د بودیجې نشتوالي په مستقیم ډول د هغو ټولنو په ژوند اغېزه کوي، چې بشري خدماتو ته اړتیا لري.
د ملګرو ملتونو د بشري مرستو د همغږۍ دفتر ویلي، د محدودو سرچینو سره سره به، لا هم په افغانستان کې بشردوستانه خدماتو وړاندې کولو ته دوام ورکړي.
