د طالبانو د ارشاد، حج او اوقافو وزارت د ښځو د محدودلو لپاره تازه ځانګړې کړنلاره صادره کړې او په دې کې یې ښځو ته امر کړی، چې «له مېړونو اطاعت وکړي، د مېړه له اجازې پرته له کوره ونوځي او هغوی ته خدمت وکړي.»
رخشانه: دا کړنلاره نن (پنشنبې د زمري ۱۵ مه) د «کورني نظام د ساتنې ارزښت او اړتیا» تر عنوان لاندې، په فارسي او پښتو ژبو صادرې شوې او په ټول هېواد کې یې د جوماتو له ملا امامانو او خطیبانو غوښتي، چې دغه موضوع د جمعې په لمانځه کې خلکو ته بیان کړي.
طالبانو په دې لارښود کې، د څو ښځو درلودل په رسمیت پېژندلي ویلي یې دي «هغه نارینه چې له یوې زیاتې ښځې لري، مکلف دي، چې د خپلو ښځو تر منځ عدالت پلی کړی.»
د طالبانو د ارشاد، حج او اقافو وزارت په لارښود کې راغلي، ښځې مکلفې دي، چې له خپلو مېړنو اطاعت وکړي. په کور پاتې شي او د خاوند له اجازې پرته له کوره ونوځي.
طالبانو په دې لارښود کې له کوره د ښځې وتل د «جاهلیت د دوران (د اسلام نه مخکې پیر) د ښکلا ښودنې سره تشبې کړې ده.
دغه وزارت د دې کړنلارې په دوام کې لیکلي چې «ښځه عورت ده او هر کله چې له کوره ووځي، د شیطان پام ورته را اوړي او د هغه په کمین کې لوېږي.»
دې وزارت په دغه تګلاره کې لیکلي چې «د مېړه له حقونو یو همدا دی، له ښځې ساتنه وکړي او په کور پاتې دي، مانا دا چې ښځه د باندې له وتو او ښکاره کېدو څخه منع شي.»
د طالبانو د حج او اوقافو وزارت ښځو ته امر کړی، چې د خپلو مېړونو خدمت وکړي، ځکه «له دینې پلوه دا کار پر ښځه واجب دی.»
دې وزارت پر دوام لیکلي دي «ښځې باید د مېړه د بېوزلۍ او تنګلاسۍ پر مهال صبر ولري او د کور اقتصادي ستونزې نورو ته بیان او له هغه شکایت ونه کړي.»
د طالبانو د حج او اوقافو وزارت له یوې میاشتې راهیسې، د ښځو د محدود کولو په پار امرونه صادر کړي دي.
دغه وزارت دوه اوونۍ وړاندې هم په یو لارښود کې ویلی وو، چې «د ښځې سینګار کول او عطر کارول» د ښځو لپاره حرام دي.
