غزني کې د طالبانو امنیه قومانداني وايي، د دې ولایت مرکز غزني ښار د څلورمې امنیتي حوزې اړوند سیمه کې، د یوې پخوانۍ مرمۍ د چاودنې له امله دوو ماشومانو ژوند له لاسه ورکړی او درې نور ټپيان شوي دي.
رخشانه: غزني کې د طالبانو د امنیه قوماندانۍ له خوا خپره شوې خبرپاڼه کې راغلي، دا پېښه پرون شنبې (د زمري ۱۷ مه) د غزني ښار د څلورمې امنیتي حوزې اړوند «نوغي» سیمه کې رامنځ ته شوې ده.
د خبرپاڼې له مخې، دا پېښه هغه مهال رامنځ ته شوې، چې ماشومانو د یوې پخوانۍ مرمۍ له موندلو وروسته، په هغې په لوبو بوخت شول.
د دې پخواني مرمۍ د چاودنې له امله، دوه ماشومانو ژوند بایللی او درې نور ټپیان شوي دي.
د پېښې ټپیان د درملنې په موخه د غزني حوزوي روغتون ته لېږدول شوي دي، خو د روغتیايي حالت په اړه یې څه نه دي ویل شوي.
غزني کې د طالبانو امنیه قوماندانۍ ویلي، د یوې بلې زړې مرمۍ چاودنې، د دې ولایت قرباغ ولسوالۍ کې یوه ۱۲ کلنه نجلۍ ټپي کړې ده.
د دې ماشومې روغتیايي حالت د ډاډ وړ ښودل شوی دی. طالبانو نه ده روښانه کړې، چې دا پېښه څه وخت رامنځ ته شوې ده.
سره له دې، چې د ماین پاکۍ بنسټونو له کلونو راهیسې هڅه کړې، په ماینونو لړلې سیمې پاکې کړي، خو لا هم د هېواد په ځینو ولایتونو کې ماینونه او ناچاودي توکي پاتې دي.
هر کال د هېواد په ګوټ ګوټ کې له پخوانیو جګړو پاتې ماینونو او ناچاودو توکو، د چاودنو له امله، لسګونه کسان په ځانګړې توګه ماشومان مړه او ټپیان کېږي.
