د افغانستان د بشري حقونو چارو لپاره د ملګرو ملتونو ځانګړي راپور ورکوونکي ریچارد بنسټ، کابل ښار کې د طالبانو په دوو وروستیو نظامي عملیاتو کې د ۱۱ تنو په وژل کېدو اندېښنه څرګنده کړې ده.
رخشانه: بنټ پرون دوشنبې (د زمري ۱۹ مه) ناوخته په خپله اېکس پاڼه د یوه پوسټ په خپرولو سره، په نظامي عملیاتو کې د وژل شویو کسانو د وژنې په اړه، د چټکو او بې پرې پلټنو غوښتنه کړې ده.
هغه لیکلي دي: «۴ تنه نن دوشنبې د نظامي عملیاتو پر مهال په مرمیو لګېدلي او ۷ تنه نور په دې وروستیو کې [کابل ښار کې د طالبانو] د اتمې امنیتي حوزې اړوند سیمه کې وژل شوي دي.»
نوموړي «په بې پرې او چټکو پلټنو» ټينګار کړی او زیاته کړې یې ده «د وژونکي ځواک هر ډول کارول باید د اړتیا او تناسب په ګډون د بشري حقونو نړیوال قانون سره سمون ولري.»
په ورته وخت، کابل کې د طالبانو د امنیه قوماندانۍ ویاند خالد ځدراڼ پرون سهار اعلان کړی، چې کابل ښار کې «څلور تنه وسله وال غله» له امنیتي ځواکونو سره په جګړه کې وژل شوي دي.
هغه ویلي وو، دا څلور تنه د کابل ښار د اتلسمې امنیتي حوزې اړوند سیمه کې یوه کور ته د غلا په نیت د ننه شوي وو او وروسته د دوی د ډلې له امنیتي ځواکونو سره نښتي او د جګړې پر مهال و وژل شول.
پرون یو شمېر رسنیو هم راپور ورکړی، چې طالبانو لس ورځې وړاندې پنځه تنه هزاره وګړي، د کابل ښار د هوايي ډګر پر سړک په یوه چک پانټ کې «په مرمیو» ویشتي.
د طالبانو د کورنیو چارو وزارت هم شاوخوا لس ورځې وړاندې اعلان کړی وو، چې د کابل ښار د اتمې امنیتي حوزې اړوند سیمه کې، اووه تنه وسله وال غله، د دې ډلې له امنیتي ځواکونوسره په نښته کې وژل شوي دي.
طالبان د مخکني نظام د نظامیانو او کارکوونکو او خپلو مخالفینو په وژلو تورن دي. دې ډلې په تېرو پنځو کلونو کې په وار وار خپل مخالفین او د مخکني نظام کارکوونکي، د بېلا بېلو تورونو له امله وژلي دي.
یوناما پرون په یوه راپور کې ویلي، د طالبانو یو شمېر چارواکي، چې په افغانستان کې له بشري حقونو په سرغړونو تورن دي، تر قانوني تعقیب لاندې نه دي نیول شوي.
